अर्घाखाँची । नेपालकै सबैभन्दा ठुलो शितगंगा नगरपालिकाले नागरिकलाई सहज सेवा दिने उद्देश्यले करदाता सेवा शाखा औपचारिक रूपमा सञ्चालनमा ल्याएको छ । नेपाल सरकार मन्त्रिपरिषद्को निर्णयबमोजिम करदाता सेवा कार्यालयहरू खारेज गरी स्थानीय तहबाटै सेवा प्रवाह गर्ने नीतिअनुरूप नगरपालिकाले यो सेवा सुरु गरेको हो । "करदाता सेवा कार्यालयबाट प्रवाह हुँदै गरेका सेवाहरू स्थानीय तहबाट प्रवाह गर्ने सम्बन्धी कार्य सञ्चालन कार्यविधि, २०८२" बमोजिम आयोजित एक समारोहबिच शाखाको उद्घाटन गरिएको छ, जससँगै लुम्बिनी प्रदेशमै स्थानीय तहबाट यस्तो सेवा सुरु गर्ने शितगंगा पहिलो पालिका बनेको छ ।
नगर प्रमुख छविलाल पौडेलले यस कदमलाई "वास्तविक अर्थमा सिंहदरबार घरघरमा पुगेको" भन्दै अब कर चुक्ता प्रमाणपत्र लिन कृष्णनगर वा अन्यत्र टाढा जानुपर्ने बाध्यता हटेको बताए । हाल नगरपालिकामा १,३८२ करदाता आबद्ध रहेका छन् । आन्तरिक राजस्व विभागका महानिर्देशक मदन दाहाल तथा अन्य कर अधिकृतहरूको उपस्थितिमा सम्पन्न कार्यक्रममा, स्थानीय तहबाटै सेवा प्रवाह हुँदा करदाताको समय र खर्च दुवै बचत हुने र कर प्रशासन थप पहुँचयोग्य एवं उत्तरदायी बन्ने विश्वास व्यक्त गरियो । विभागले आवश्यक प्राविधिक सहयोग निरन्तर उपलब्ध गराउने प्रतिबद्धता जनाएको छ भने नगर प्रमुख पौडेलले नागरिकलाई सहज, छरितो र गुणस्तरीय सेवा प्रवाह गर्ने प्रतिबद्धतासहित कार्यक्रम समापन गरेका थिए ।
