नवलपरासी–२ मा जसपाबाट ‘जेन–जी’ देबेन्द्र यादवको उम्मेदवारी, यस्तो छ प्रतिवद्धता

नवलपरासी । जनता समाजवादी पार्टी (जसपा) नेपालका तर्फबाट नवलपरासी क्षेत्र नम्बर २ मा युवा नेता देवेन्द्र यादवले आफ्नो उम्मेदवारी दर्ता गराउनुभएको छ। राजनीतिमा नयाँ पुस्ता र युवा सहभागिताको बहस चलिरहँदा यादवले आफूलाई ‘जेन–जी’ नयाँ पुस्ताको प्रतिनिधिका रूपमा उभ्याउँदै चुनावी मैदानमा होमिनुभएको हो।

उम्मेदवारी दर्ता लगत्तै प्रतिक्रिया दिँदै यादवले अन्य प्रमुख राजनीतिक दलहरूले युवा पुस्तालाई खासै स्थान नदिएको परिप्रेक्ष्यमा जसपा नेपालले युवाहरूलाई विश्वास गरेर टिकट दिएकोमा गर्व व्यक्त गर्नुभयो। उहाँले आफूलाई केवल उम्मेदवार मात्र नभई नयाँ पुस्ताको आवाजका रूपमा प्रस्तुत गर्दै युवाहरूको भावना र माग सम्बोधन गर्न राजनीतिमा आएको बताउनुभयो। व्यक्तिगत स्वार्थभन्दा माथि उठेर समाज सेवा गर्ने लक्ष्य लिएका यादवले मधेशमा व्याप्त उत्पीडन, विभेद र समस्याहरूको समाधानका लागि आफू कटिबद्ध रहेको जिकिर गर्नुभएको छ।

आफ्नो चुनावी एजेन्डा समावेशी रहेको दाबी गर्दै उहाँले दलित समुदाय लगायत विभिन्न जातजाति र संघ–संस्थाहरूका मुद्दालाई समेटेर सबैलाई साथमा लिई अगाडि बढ्ने प्रतिवद्धता जनाउनुभयो। पूर्वमन्त्रीहरू तथा पार्टीका वरिष्ठ नेताहरूको साथ र समर्थन रहेकाले चुनावमा विजय हासिल गरी आम जनताका सपना पूरा गर्ने दृढता समेत यादवले व्यक्त गर्नुभएको छ।