काठमाडौँ । सरकारले सुनसरीको देवानगञ्ज गाउँपालिका–३ कप्तानगञ्जमा हालै भएको घटनापछि उत्पन्न परिस्थितिप्रति आफ्नो गम्भीर ध्यानाकर्षण भएको जनाउँदै सम्बद्ध सबै पक्षलाई संयमता अपनाउन आग्रह गरेको छ । प्रधानमन्त्री तथा मन्त्रिपरिषद्को कार्यालयका प्रवक्ता एवं सहसचिव हेमराज अर्यालद्वारा जारी विज्ञप्तिमा घटनामा परी घाइते भएकाहरूको निःशुल्क स्वास्थ्य उपचारको व्यवस्था मिलाइएको उल्लेख छ ।
उपचारको सम्पूर्ण प्रबन्ध स्वास्थ्य तथा खाद्य स्वच्छता मन्त्रालयमार्फत मिलाइएको सरकारले जनाएको छ । यसैगरी, घटनाको सत्यतथ्य छानबिन गरी आगामी दिनमा यस्ता घटना दोहोरिन नदिन अपनाउनुपर्ने उपायसहित सात दिनभित्र प्रतिवेदन पेस गर्ने गरी गृह मन्त्रालयले छानबिन समिति गठन गरिसकेको छ । उक्त समितिले आफ्नो कार्यसमेत प्रारम्भ गरिसकेको विज्ञप्तिमा जनाइएको छ ।
