लुम्बिनी । रूपन्देही क्षेत्र नम्बर ५ मा नेपाल कम्युनिस्ट पार्टीका उम्मेदवार तथा पूर्व वनमन्त्री मोहम्मद वकील मुसलमान खांले चुनावी घरदैलो कार्यक्रमलाई तीव्र पारेका छन् । मतदातासँग प्रत्यक्ष भेटघाट गर्दै उनले सडक स्तरोन्नति, खानेपानी, शिक्षा, स्वास्थ्य, कृषि आधुनिकीकरण र युवा रोजगारीलाई आफ्नो मुख्य एजेन्डाका रूपमा प्रस्तुत गरेका छन् ।
परम्परागत शैलीभन्दा फरक र जनकेन्द्रित राजनीति गर्ने दाबी गरेका उनले क्षेत्र नम्बर ५ लाई समृद्ध र नमुना बनाउने प्रतिबद्धता जनाएका छन् । उम्मेदवार स्वयं घरआँगनमै आएर समस्या सुनेपछि स्थानीय मतदाताले अभियानलाई सकारात्मक रूपमा लिँदै उनीप्रति भरोसा व्यक्त गरेका छन्। घरदैलो अभियानसँगै रूपन्देही–५ को चुनावी माहोल र राजनीतिक सरगर्मी निकै बढेको छ।
