भैरहवा । रुपन्देहीको भैरहवास्थित लुम्बिनी प्रदेशस्तरीय बालसुधार गृहमा एक जना बाल कैदीले आत्महत्या गरेका छन् । जिल्ला प्रहरी कार्यालय, रुपन्देहीका अनुसार शनिबार दिउँसो २१ वर्षीय सन्दिप गोसाईले झुण्डिएर आत्महत्या गरेका हुन् ।
सम्मरीमाई गाउँपालिका–४ का स्थायी बासिन्दा गोसाई जबरजस्ती करणी मुद्दामा कैद सजाय काटिरहेका थिए । प्रहरी नायव उपरीक्षक (डीएसपी) गणेश सापकोटाका अनुसार, शनिबार दिउँसो कैदीहरुको गणना गर्ने क्रममा गोसाई सुधार गृहको तेस्रो तल्लामा रहेको स्टोर कोठामा झुण्डिएको अवस्थामा फेला परेका थिए ।
विगत एक वर्षदेखि सुधार गृहमा मोनिटर (नाइके) को जिम्मेवारी सम्हाल्दै आएका गोसाईले नरिवलको डोरीले पासो लगाएर आत्महत्या गरेको प्रहरीले जनाएको छ । घटनाबारे थप अनुसन्धान भइरहेको छ ।
