परासी । पश्चिम नवलपरासीको रामग्रामबाट लागूऔषधसहित चार जना युवा पक्राउ परेका छन । रामग्राम नगरपालिका–२ कालिकाटोलमा मोहम्मद सरिफ कुरेशीको घरमा खानतलासी गर्दा लागूऔषध सेवन गरी लठ्ठिएको अवस्थामा उनीहरुलाई प्रहरीले पक्राउ गरेको हो ।
जिल्ला प्रहरी कार्यालय परासीका सूचना अधिकारी डीएसपी रेशम बोहराका अनुसार पक्राउ पर्नेमा सुनवल नगरपालिका वडा नम्बर १२ का २४ वर्षीय सन्दिप परियार, रूपन्देहीको देवदह नगरपालिका–७ बस्ने १९ वर्षीय राजन विक, रोहिणी गाउँपालिका–६ का ईरशाद मियाँ र रामग्राम नगरपालिका–२ का मोहम्मद सरिफ कुरेशी रहेका छन् ।
उनीहरूको साथबाट डाइजापाम २८ एम्पुल, फेनारगन २८ एम्पुल, बुप्रिनुर्फिन २७ एम्पुल र सिरिन्ज बरामद भएको छ । पक्राउ परेका चारै जनालाई लागूऔषध सम्बन्धी कसुरमा जिल्ला अदालतबाट म्याद थप गरेर अनुसन्धान भइरहेको प्रहरीले जनाएको छ ।
