अर्घाखाँची । अर्घाखाँचीमा आज बिहान भएको जिप दुर्घटनामा दुई जनाको मृत्यु भएको छ भने २४ जना घाइते भएका छन्। सन्धिखर्कबाट गुल्मीको पुर्कोटतर्फ जाँदै गरेको लु १ ज ४७२४ नम्बरको जिप बिहान करिब साढे ३ बजे सन्धिखर्क नगरपालिका–९ टारीमा दुर्घटनामा परेको थियो ।
मृत्यु हुनेमा गुल्मीको मदाने गाउँपालिका–६ पुर्कोट बस्ने १० वर्षीया अरुणा थापा र मदाने गाउँपालिका–७ नेटाखर्क बस्ने १३ वर्षीय नारायण पौडेल रहेको जिल्ला प्रहरी कार्यालय अर्घाखाँचीका सूचना अधिकारी इन्सपेक्टर झलक प्रसाद शर्माले जानकारी दिए। उनीहरूको सन्धिखर्क अस्पतालमा उपचारको क्रममा मृत्यु भएको हो ।
दुर्घटनामा ४ जनाको अवस्था गम्भीर रहेकोले उनीहरूलाई बुटवल रिफर गरिएको छ। अन्य २० जनाको अवस्था मध्यम र सामान्य रहेको छ। चालक चेतन कुँवरसहित २६ जना सवार जिप सडकबाट करिब ६०-७० मिटर तल खसेको थियो। घटनाबारे थप अनुसन्धान भइरहेको प्रहरीले जनाएको छ ।
