धकधई । इलाका प्रहरी कार्यालय धकधईको आयोजनामा रुपन्देहीको रोहिणी गाउँपालिका–३ मा नागरिक सुनुवाइ कार्यक्रम सम्पन्न भएको छ। शान्ति सुरक्षा, प्रहरी सेवा र नागरिक-प्रहरी सम्बन्धलाई सुदृढ बनाउने उद्देश्यले आयोजित उक्त कार्यक्रम जिल्ला प्रहरी कार्यालय रुपन्देहीका प्रमुख प्रहरी उपरीक्षक जनकबहादुर शाहीको प्रमुख आतिथ्यतामा सम्पन्न भएको हो।
कार्यक्रममा रोहिणी गाउँपालिकाका वडाअध्यक्ष वीरबहादुर क्षेत्री, इलाका प्रहरी कार्यालय धकधईका प्रमुख प्रहरी निरीक्षक रामभक्त भट्टराई, स्थानीय जनप्रतिनिधि, विभिन्न सङ्घसंस्था, आमा समूहका प्रतिनिधि, बुद्धिजीवी एवम् समाजसेवीसहित दुई सयभन्दा बढीको सहभागिता रहेको थियो।
सो अवसरमा सहभागी स्थानीयहरूले सीमित साधन-स्रोतका बाबजुद प्रहरी निरीक्षक रामभक्त भट्टराईको नेतृत्वमा इलाका प्रहरी कार्यालय धकधईले यस क्षेत्रको शान्ति सुरक्षामा उल्लेखनीय सुधार गर्दै सर्वसाधारणलाई प्रभावकारी सेवा प्रवाह गरेको भन्दै प्रहरीको प्रशंसा गरेका थिए।
