नवलपरासी । रामग्राम नगरपालिका–१८ डिघवलस्थित तुरिया खोलाको वर्षौंदेखि बाँझो र बगरका रूपमा रहेको जमिनलाई हरियाली, कृषि उत्पादन र पर्यटकीय गन्तव्यका रूपमा विकास गर्ने अभियानमा स्थानीय युवा देवेन्द्र चौधरी जुट्नुभएको छ। उहाँले कृषि र पर्यटनलाई जोड्ने उद्देश्यका साथ ‘कोलिय एग्रो टुरिज्म पार्क’ सञ्चालनको पहल गर्नुभएको हो।
चौधरीले सुरुमा प्रयोगविहीन अवस्थामा रहेको विद्यालयको जग्गा भाडामा लिएर फूल तथा तरकारी खेती सुरु गर्नुभएको थियो। हाल उहाँले प्रति कट्ठा एक हजार रुपियाँ भाडा तिर्ने गरी तुरिया खोला किनारको करिब २० बिघा बगर क्षेत्रलाई खेतीयोग्य बनाउने अभियान अघि बढाउनुभएको छ। वातावरण संरक्षण र पार्कको सौन्दर्य अभिवृद्धिका लागि परिसरमा वृक्षारोपणसमेत गरिएको छ।
यस अभियानमा लुम्बिनी प्रदेश सरकारबाट केही सहयोग प्राप्त भए पनि बगरलाई पूर्ण रूपमा रूपान्तरण गर्न माटो व्यवस्थापन, सिँचाइ र पूर्वाधार निर्माणका लागि थप सहयोग आवश्यक रहेको चौधरीले बताउनुभयो। स्थानीय उद्यमी नरेश जैसवालले युवा चौधरीको यो प्रयासले बाँझो जमिनको सदुपयोग, वातावरणीय सुधार र कोलिय इतिहासको संरक्षणमा टेवा पुग्ने भन्दै तीनै तहका सरकारले प्रोत्साहन गर्नुपर्नेमा जोड दिनुभयो।
