भैरहवा । भैरहवामा जारी प्रधानमन्त्री कप पुरुष राष्ट्रिय क्रिकेट प्रतियोगितामा लुम्बिनी प्रदेशले गण्डकी प्रदेशलाई १४ रनले पराजित गरेको छ । जितको लागि लुम्बिनी प्रदेशलाई कडा परिश्रम गर्नुपरेको थियो । अन्तिम ओभरमा धकेलिएको खेलमा लुम्बिनीले रोमाञ्चक जित निकालेको हो । भैरहवाको सिद्धार्थ क्रिकेट रङ्गशालामा भएको खेलमा २१८ रनको लक्ष्य पछ्याएको गण्डकी ५० ओभरमा आफ्ना ९ विकेट गुमाउदै २०३ रन मात्र बनाउन सक्यो ।
गण्डकीका अर्जुन कुमालले खेललाई लयमा फर्काउन केही उत्कृष्ट शट खेले पनि उहाँले टिमलाई जित दिलाउन सकेनन । उनले ८६ बल खेल्दै ८ चौकाको सहयोगमा ६२ रन बनाए । यस्तै सुभाष भण्डारीले ३०, मुस्कान थापा २४ र अमृत गुरुङ्गले पनि २४ रन बनाए ।
बलिङ्गमा निर्मल गुरुङ्गले ८ ओभरमा ३१ रन खर्चिदै ३ विकेट लिए । यसै गरि विपर्सन केसीले २, रमेश कुर्मी र नर सार्कीले समान १/१ विकेट लिए ।
यस अघि भैरहवा स्थित सिद्धार्थ क्रिकेट रङ्गशालामा टस हारेर ब्याटिङको निम्तो पाएको लुम्बिनीले ४९.५ ओभरमा सबै विकेट गुमाउदै २१७ रन बनाएको थियो । लुम्बिनीका लागि सबैभन्दा धेरै प्रज्वल थापाले ७२ रन बनाए । उनले ७९ बलको सामना गर्दै ७ चौका र १ छक्का प्रहार गरे । यसै गरि ओपनर ब्याट्सम्यानद्वय मृनाल गुरुङ्गले ३८ रन र मनिष थापाले २४ रन बनाए । लुम्बिनीका लागि देव खनालले ३३ रन बनाउदा अर्का ब्याट्सक्यान विपर्सन केसीले २५ रन बनाए ।
बलिङ्गमा गण्डकी प्रदेशका चन्द्रकान्त पौडेल र विपिन खत्री र अमृत गुरुङ्गले समान २/२ विकेट लिदा सुवाष भण्डारी, कमल परियार र वंश क्षेत्रीले १/१ विकेट बाँडे ।
जित संगै लुम्बिनीले २ अंक जोडेको छ । ३ खेल मध्ये २ मा जित र १ मा हार भएको लुम्बिनी ४ अंक सहित अंकतालिकाका चौथो स्थानमा उक्लिएको छ भने गण्डकी ३ खेलमा १ जित र २ हार संगै २ अंक सहित अंकतालिकामा आठौ स्थानमा झरेको छ ।
