भैरहवा । लुम्बिनी प्रदेशकी नवनियुक्त महिला, बालबालिका तथा जेष्ठ नागरिक मन्त्री भगवती अधिकारीले बिगतमा कस्ता कार्यक्रमहरु अघि बढेका छन् सबै फाइल ल्याउन निर्देशन दिएकी छन् ।
बिहिवार दाङको देउखुरीस्थित मन्त्रालयमा पदभार ग्रहण गर्दै अधिकारीले भनिन्, 'यसअघि यस मन्त्रालयबाट के कस्ता कार्यक्रमहरु अघि बढाइएको छ, फाइल मेरो टेबलमा ल्यानुस् म हेर्छु र केही काम गर्नुपर्नेछ ।
पदभार ग्रहणपछि संचारकर्मीसँग कुरा गर्दै अधिकारीले महिला, बालबालिका र ज्येष्ठ नागरिक मन्त्रालय आफ्नो लागि एकदमै उपयुक्त मन्त्रालय भएको बताइन् । उनले महिला भएर राजनीतिमा संघर्ष गर्दै यहाँसम्म आएको कारण केही गर्ने हुटहुटी भएको जानकारी दिइन् । अधिकारीले भनिन, 'म कति समय यो मन्त्रालयमा रहौला यो गौण विशय हो तर मैले जाने बेला केही परिवर्तनको झल्को दिएर बिदा हुनेछु ।
अधिकारीले धर्म संस्कृतिका नाममा हुने कुसंस्कार, महिला तथा बालबालिका बेचबिखन र हिंसा रोकथामको लागि मन्त्रालयले विशेष कदम चाल्ने बताइन् । अहिले पनि हाम्रो समाजमा महिलामाथि हिसां हुने गरेको छ, बालश्रम र बाल शोषण ब्याप्त अवस्थामा छ, ज्येष्ठ नागरिकहरुको सामाजिक सुरक्षाको लागि धेरै काम गर्नुपर्ने छ । अधिकारीले समाजवादको एउटा प्रमुख पक्ष भनेकै महिला, बालबालिका र ज्येष्ठ नागरिकहरुको सुरक्षा भएको बताइन् ।
मन्त्री अधिकारीले महिला, बालबालिका र जेष्ठ नागरिकमैत्री ब्यवहार देखिने गरी लुम्बिनी प्रदेश सरकारले कामको थालनी गर्ने पनि बताइन् । सो अवसरमा मन्त्रालयका अधिकारीहरुले मन्त्री अधिकारीलाई स्वागत समेत गरेका थिए ।