काठमाडौं । अफ्रिका कप अफ नेशसन्समा सेनेगलले अन्तिम १६ मा स्थान पक्का गरेको छ । शुक्रबार राति भएको खेलमा क्यामरुनलाई पराजित गर्दै सेनेगलले लगातार दोस्रो जितका साथ समूह सीबाट अफ्रिका कपको नकआउट चरणमा स्थान पक्का गरेको हो ।
सेनेगलले क्यामरुनविरुद्ध ३–१ गोल अन्तरको जित निकालेको हो । इस्माइला सारले १६ औं मिनेटमा अग्रता दिलाएका थिए । अरु गोल भने खेलको अन्त्यतिर निस्किए । ७१ औं मिनेटमा मोहम्मदु डिआलोले गोल गरेपछि सेनेगलको अग्रता दोब्बर भएको थियो ।
८३ औं मिनेटमा जिन कार्लेसले क्यामनरुनका तर्फबाट १ गोल फर्काउँदै अन्तर कम गरेका थिए । तर, दोस्रो हाफको अतिरिक्त समयमा साडियो मानेले गोल गर्दै सेनेगललाई ३–१ को सहज जित दिलाए ।
समूह सीकै अर्को खेलमा गुएनाले गम्बियालाई १–० गोल अन्तरले पराजित गरेको छ । अगुइबो कमाराले ६९ औं मिनेटमा गरेको गोल नै निर्णायक बन्न पुग्यो । समूह सीबाट सेनेगल ६ अंकका साथ शीर्ष स्थानमा छ भने गुएना ४ अंकका साथ दोस्रो स्थानमा रहेको छ । क्यामरुनले १ अंकमात्रै जोडेको छ भने गाम्बियाले खाता खोल्न सकेको छैन ।
