भैरहवा । काठमाण्डौँको पेप्सीकोला स्थित नेक्सस क्रिकेट एकेडेमीले निःशुल्क क्रिकेट क्याम्प (प्रशिक्षण) गर्ने भएको छ । एकेडेमीले चालु वर्षमा एसइई परिक्ष दिएका दुई सय जना विधार्थीहरुलाई निःशुल्क क्रिकेट खेलको क्याम्प (प्रशिक्षण) गर्ने भएको हो ।
उक्त क्याम्प मुलपानी क्रिकेट रंगशाला र एकेडेमीको प्राङगणमा अगामी चैत २८ गते देखि बैशाख १८ गतेसम्म संचालन हुने नेक्सस क्रिकेट एकेडेमीले जनाएको छ ।
एकेडेमीले क्रिकेट खेलको विकासका लागि आयोजना गरेको क्याम्प यो पाँचौ संस्करण हो । क्याम्पको आयोजना लुकेका प्रतिभाको प्रस्टफुटन हुने विश्वास लिइएको नेक्सस एकेडेमीका अध्यक्ष भरत कुमार शाहीले बताए ।
नवप्रतिभाहरुको खोजी गरी नेपाली क्रिकेटलाई अब्बल खेलाडी सुम्पिने महत्वपूर्ण अभियान रहेको भन्दै उनले एसइई क्याम्बाटै अन्डर नाईन्टिन टिमका खेलाडी उत्तम थापा मगर र अन्डर सिक्सटिनका अशोक धामी लगायतका दर्जन बढी खेलाडीको रुपमा तयार भएको बताए ।
उक्त क्याम्पमा सहभागीका हुनका लागि अनलाइन फारम भर्नुपर्ने हुन्छ । फारम भर्ने पहिलो दुई सयजनालाई क्याम्पका लागि छनौट गरिने अध्यक्ष शाहीले जानकारी दिए ।
‘क्याम्पमा सहभागी हुनका लागि एसइई परिक्षा दिएका विधार्थीहरुले देशको जुनसुकै स्थानबाट निःशुल्क फारम भर्न सक्नेछन्’ उनले भने, ‘जसका लागि नेक्सस क्रिकेट एकेडेमीको फेसबुक पेजमा फारम उपलब्ध गराइएको छ ।’
उनले क्याम्पमा सहभागी खेलाडीहरुलाई पाकिस्तानको पहिलो श्रेणीका खेलाडी रहिसकेका पाकिस्तान क्रिकेट बोर्डबाट लेभल एक गरेका प्रशिक्षक ईम्तिहाज हुसैन र वरिष्ठ नेपाली प्रशिक्षकहरुबाट प्रशिक्षण दिइने बताए । सहभागी खेलाडीहरुलाई १० वटा खेल मार्फत प्रशिक्षण दिइने बताइएको छ ।
