भैरहवा । भैरहवा भन्सार कार्यालयले भन्सार छलेर भित्राइएको आंशकामा ठुलो परिमाणमा चिनी बरामद गरेको छ । साथै, चिनी लोड गरिएको एउटा ट्रक समेत नियन्त्रणमा लिएको जनाएको छ । शुक्रवार सिद्धार्थनगर –४ बाट लु २ ख २८८२ नम्बरको ट्रकमा करिब ५ लाख मूल्य बराबरको १ सय ६२ बोरा चिनी लोड गरी लैजान लागेको अवस्थामा चिनी सहित ट्रक नियन्त्रणमा लिइएको भैरहवा भन्सार कार्यालयका प्रमुख नारद गौतमले जानकारी दिए ।
एउटा बोरामा ५० किलो चिनी रहेकोले बरामद चिनी आठ हजार एक सय किलो छ । कार्यालयको टोली पुगे लग्त्तै ट्रक चालक साँचो सहित फरार भएको उनले बताए ।तस्करहरुले दैनिक थोरै परिमाणमा भन्सार छलेर भैरहवा बजारमा चिनी ल्याएर डम्प गर्ने र परिमाण धेरै भएपछि ट्रक मार्फत मुलुकको विभिन्न स्थानमा पठाउने गर्ने गर्दछन् । जस अनुसार कार्य गरिरहेको आशंकामा भन्सारले नियन्त्रणमा लिएको हो । नियन्त्रणमा लिइएको उक्त ट्रकमा महोत्तरी जिल्लाको एक सुगरमिलको नाम लिखित एक सय खाली बोरा, तौल मेसिन समेत बरामद भएको प्रमुख गौतमले बताए ।
‘भन्सार छलेर भित्राइएको चिनी ठुलो परिमाणमा अन्यत्र लगिदैछ भन्ने हामीलाई सूचना प्राप्त भएको थियो’ भन्सार प्रमुख गौतमले भने,‘जसअनुसार हामी सम्बन्धित स्थानमा पुग्दा भन्सार प्रज्ञापन पत्र/बिल बिजक केही नभएको अवस्थामा चिनी र ट्रक नियन्त्रणमा लिएका हौँ ।
’ उनले ट्रक र चिनीको दावी गर्न आउने फर्म/व्यक्तिसगँ आवश्यक कागजत लिएर जाँचबुझ गर्ने र कानुन बमोजिम नपाइए कारवाही प्रक्रिया अगाडी बढाइने बताए । पछिल्लो समय भन्सार छली विरुद्ध भैरहवा भन्सार कार्यालय आक्रमक रुपमा उत्रिएको छ । कार्यालयले भन्सार छलेर ठूलो परिमाणमा भित्राइएको विभिन्न साम्रगीहरु धमाधम गाडीसहित नियन्त्रणमा लिएर कारवाही अभियान चलाएको छ ।
