दैलेख दैलेखका तीनवटा विद्यालयका विद्यार्थीहरूलाई शैक्षिक सामग्री तथा स्कूल ब्याग वितरण गरिएको छ । नेपाल प्रहरी श्रीमती संघको आयोजना र नेपाल एस.बि.आई. बैंक लिमिटेडको सहकार्यमा नारायण नगरपालिका–९ स्थित ईश्वरी आधारभूत विद्यालय, दुल्लु नगरपालिका–७ स्थित श्री राष्ट्रिय माध्यमिक विद्यालय र नारायण नगरपालिका–१ स्थित श्री बालमन्दिर आधारभूत विद्यालयका विद्यार्थीहरूलाई सो सामग्री वितरण गरिएको हो ।
ईश्वरी आधारभूत विद्यालयका विद्यालय व्यवस्थापन समिति अध्यक्ष लोमन शर्माको अध्यक्षतामा सम्पन्न कार्यक्रममा नेपाल प्रहरी श्रीमती संघका अध्यक्ष नबिना खत्री कार्कीको प्रमुख आतिथ्यता रहेको थियो । कार्यक्रममा कर्णाली प्रदेश प्रहरी कार्यालय सुर्खेतका प्रमुख प्रहरी नायब महानिरीक्षक जयराज सापकोटा, जिल्ला प्रहरी कार्यालय दैलेखका प्रमुख प्रहरी नायब उपरीक्षक श्रवण कुमार बि.क. लगायतको उपस्थिति रहेको थियो ।
