काठमाडौँ । नेपालीहरूको दोस्रो ठूलो चाड तिहार आजदेखि सुरु भएको छ। आज नयाँ गरगहना, सुनचाँदीका सिक्का वा धातुका भाँडाकुँडा खरिद गरी घरमा पूजा गरेर धनतेरस पर्व मनाइँदैछ। यस वर्ष तिथिको घटबढका कारण सामान्यतया पाँच दिन मनाइने तिहार छ दिनको हुने भएको छ। पण्डित नारायणप्रसाद दुलालका अनुसार आज मध्याह्न ११ बजेर १० मिनेटपछि त्रयोदशी तिथि सुरु हुने भएकाले आजै धनतेरस मनाउन लागिएको हो।
उक्त तिथि भोलि शनिबार बिहान १० बजेर ४७ मिनेटसम्म रहनेछ। यसपालि कागपूजा र धन्वन्तरी जयन्ती भोलि शनिबार, कुकुरपूजा र लक्ष्मीपूजा आइतबार तथा भाइटीका कात्तिक २५ गते परेको छ। मिथिला क्षेत्रमा यसै दिन साँझ दीपमालिका गर्ने तथा धातुका सामान, खरेटो र धनियाँ किन्ने परम्परा छ। धनतेरसका लागि नेपाल राष्ट्र बैंकको बबरमहलस्थित कार्यालयबाट सुनचाँदीका सिक्का बिक्री आज पनि निरन्तर जारी रहने जनाइएको छ।
