कपिलवस्तु । लुम्बिनी प्रदेश प्रहरी प्रमुख प्रहरी नायव महानिरीक्षक भूपेन्द्र बहादुर खत्रीले जिल्ला प्रहरी कार्यालय कपिलवस्तुको स्थलगत निरीक्षण तथा अनुगमन गर्नुभएको छ। अनुगमनका क्रममा उहाँले कार्यालयको वस्तुस्थिति बुझ्दै मातहतका प्रहरी कर्मचारीहरूलाई शान्ति सुरक्षा र सेवा प्रवाहका विषयमा आवश्यक निर्देशन दिनुभयो।
निर्देशनका क्रममा डीआईजी खत्रीले जिल्लाको शान्ति–सुरक्षा कायम राख्न र अपराध नियन्त्रणमा शून्य सहनशीलता अपनाउन जोड दिनुभयो। उहाँले विशेषगरी निर्वाचन सुरक्षालाई प्रभावकारी बनाउनुका साथै ट्राफिक व्यवस्थापन र लागुऔषध नियन्त्रणमा निर्ममतापूर्वक प्रस्तुत हुन निर्देशन दिनुभएको छ। यसका साथै उहाँले महिला, बालबालिका तथा जेष्ठ नागरिकहरूको संरक्षण एवं विपद् व्यवस्थापन जस्ता संवेदनशील विषयहरूमा उच्च सतर्कता अपनाई नागरिकमैत्री भएर जिम्मेवारी पूरा गर्न जिल्लास्थित सम्पूर्ण प्रहरी कर्मचारीहरूलाई आग्रह गर्नुभयो।
