भैरहवा । रुपन्देहीको शुद्धोधन गाउँपालिका–४ स्थित हाटबजारमा भीडभाडको मौका छोपी करिब दुई तोला बराबरको सुनको सिक्री लुटपाट गरेको आरोपमा प्रहरीले पाँच जनालाई पक्राउ गरेको छ । पक्राउ पर्नेमा सिद्धार्थनगर नगरपालिका–११ का ३१ वर्षीय अकलेश बृजवासी, वीरगञ्ज महानगरपालिका–२० का २८ वर्षीय राजन राय, सोही पालिका-१६ का नाबालक, सोही स्थानका २१ वर्षीय अमन राय र भारतको बिहार राज्य, मोतिहारीका ४० वर्षीय मोहम्मद इमाम रहेको प्रहरीले जनाएको छ।
जिल्ला प्रहरी कार्यालय रुपन्देहीका सूचना अधिकारी एंव डीएसपी कृष्ण कुमार चन्दका अनुसार, पक्राउ परेकाहरुको साथबाट सुनजस्तो देखिने सिक्री १ थान, मोबाइल फोन ४ थान र बा १९ च ४३७७ नम्बरको स्कर्पियो गाडी बरामद भएको छ। पक्राउ परेकाविरुद्ध चोरी मुद्दामा पाँच दिनको म्याद थप गरी थप अनुसन्धान भइरहेको प्रहरीले जनाएको छ।
