कञ्चन । रुपन्देहीको कञ्चन गाउँपालिकामा डेंगी तथा जापनिज इन्सेफ्लाइटिस जस्ता कीटजन्य रोगहरुको नियन्त्रणका लागि "लामखुट्टेको बासस्थान खोजौं र लार्भा नष्ट गरौं" अभियान सञ्चालन गरिने भएको छ। कञ्चनका ५ वटै वडाहरुमा स्थानीय समुदाय, संघसंस्था, जनप्रतिनिधि र कर्मचारीहरुको बृहत् सहभागितामा यो अभियान अघि बढाइने स्वास्थ्य शाखाले जनाएको छ।
स्वास्थ्य शाखा प्रमुख ढाल बहादुर जि.सी.का अनुसार, अभियान अन्तर्गत असोज मसान्तसम्म हरेक हप्ताको शनिबार टोल, बस्ती, विद्यालय, सरकारी कार्यालय र ग्यारेज जस्ता स्थानहरुमा लामखुट्टेको बासस्थान खोजी गरी लार्भा नष्ट गरिनेछ।
यसैगरी, प्रमुख प्रशासकीय अधिकृत माधवराज पाख्रेलले हरेक शुक्रबार बिहान १० बजे १० मिनेट सरसफाई कार्यक्रम सञ्चालन गरिने जानकारी दिनुभयो। यस अभियानमा विद्यालय स्तरमा स्वास्थ्य शिक्षा कार्यक्रम, स्थानीय सञ्चारमाध्यमबाट जनचेतनामूलक जिङ्गल प्रसारण र प्रचारप्रसार जस्ता कार्यक्रमहरु पनि समावेश गरिएको छ। अभियानको मुख्य उद्देश्य कञ्चनलाई डेंगीमुक्त पालिका बनाउनु रहेको सहभागीहरुले प्रतिबद्धता जनाएका छन्।
