सुस्ता । लामो प्रतीक्षापछि जापान सरकारको सहयोगमा प्रतापपुर गाउँपालिकाले एक थान दमकल प्राप्त गरेको छ। यसले गाउँपालिका र छिमेकी क्षेत्रहरूमा विपद् जोखिम न्यूनीकरणमा महत्वपूर्ण सहयोग पुग्ने अपेक्षा गरिएको छ। गाउँपालिका अध्यक्ष उमेश यादवले दुई वर्षको अथक प्रयासपछि जापान सरकार, युनाइटेड मिसन टु नेपाल र सुनवल सामुदायिक विकास केन्द्रको सहकार्यमा यो 'वरुण यन्त्र' प्राप्त भएको जानकारी दिनुभयो ।
गाउँपालिका अध्यक्षले अब दमकलले आगजनीका घटनाहरूमा हुने क्षति न्यूनीकरण गर्न र भविष्यमा हुन सक्ने सम्भावित विपत्तिबाट समुदायलाई जोगाउन मद्दत पुग्ने विश्वास व्यक्त गर्नुभयो। दमकल प्राप्तिको प्रक्रियामा भएको ढिलाइबारे छलफल भए पनि अन्ततः यसले समुदायको सुरक्षामा ठूलो भूमिका खेल्ने निश्चित भएको छ। अध्यक्ष यादवले सहयोग पुर्याउनुहुने सबैलाई आभार व्यक्त गर्दै दमकल सञ्चालनमा सबैको सहयोगको अपेक्षा गर्नुभयो।
