भैरहवा । आन्तरिक पर्यटन प्रवर्द्धन गर्ने उद्देश्यले सोसाइटी अफ टुर एण्ड ट्राभल अपरेटर्स (सोट्टो) नेपाल, लुम्बिनी प्रदेशले भैरहवामा प्रणय दिवस (भ्यालेन्टाइन डे) को अवसर पारेर ‘थारु लोक संस्कृति एवम् खाना महोत्सव’ आयोजना गर्ने भएको छ । आउँदो फागुन २ गते हुने यो महोत्सवले थारु समुदायको माघी पर्वको समापनसँगै स्थानीय संस्कृति, भेषभूषा र मौलिक खानाको स्वाद पस्कने तयारी गरेको छ ।
सोट्टो लुम्बिनीका अध्यक्ष सञ्जय बजिमयका अनुसार पश्चिम तराईको आदिवासी थारु समुदायको मौलिकतालाई पर्यटनसँग जोड्ने र आर्थिक गतिविधि चलायमान बनाउने उद्देश्यले यो कार्यक्रम गर्न लागिएको हो । महोत्सवमा थारु सांस्कृतिक प्रस्तुतिलाई मुख्य प्राथमिकता दिइएको छ भने कार्यक्रमको अन्त्यमा डिजे सेसन र सुलभ दरमा घोडा वा बग्गी चढ्ने व्यवस्था समेत रहनेछ ।
विद्यार्थीलाई सहुलियत सहित १ सय देखि १ हजार रुपैयाँसम्मको टिकट दर तोकिएको यस कार्यक्रममा थारु कल्याणकारी सभा र स्थानीय व्यवसायीहरूको समेत सहकार्य रहेको छ । लुम्बिनीको प्रवेशद्वार र अन्तर्राष्ट्रिय विमानस्थल रहेको भैरहवा क्षेत्रमा यस्ता सांस्कृतिक गतिविधिले पर्यटक आकर्षित गर्न र सुस्ताएको पर्यटन व्यवसायलाई उकास्न मद्दत पुग्ने विश्वास आयोजकले लिएका छन् ।
