काठमाडौं । प्रधानमन्त्री पुष्पकमल दाहाल ‘प्रचण्ड’ले २०५८ सालमा भएको दरबार हत्याकाण्डको छानबिन हुने बताएका छन् । सोमबार बाराको सिमरा विमानस्थलमा सञ्चारकर्मीसँगको कुराकानीमा प्रधानमन्त्री दाहालले यस्तो बताएका हुन् । २०५८ जेठ १९ गते साँझ नारायणहिटी राजदरबारभित्रै भएको हत्याकान्डमा तत्कालीन राजा वीरेन्द्र शाहसहित परिवारै मारिएका थिए । उक्त हत्याकाण्डको सत्यतथ्य छानबिन हुने प्रधानमन्त्री दाहालले बताए ।
उनले संघीय लोकतान्त्रिक गणतन्त्रले सबैलाई स्वतन्त्रतापूर्वक अधिकार दिए पनि व्यवस्थाका विरूद्ध उभिने र षड्यन्त्रपूर्ण गतिविधि गर्ने अधिकार कसैलाई नभएको समेत स्पष्ट पारे ।
गत शुक्रबार मात्रै पूर्वराजा ज्ञानेन्द्र शाहले आफ्ना दाजुको सपरिवार हत्या भएको घटना आफ्नो नाम जोडेर टिकाटिप्पणी भएकोमा गुनासो गरेका थिए ।
नागरिक अभिनन्दन ग्रहण गर्न वीरगंज पुगेका पूर्वराजा शाहले राजदरबार हत्याकाण्डपछि राजनीतिक जालझेल गरी धेरै नेपालीको मनमा भ्रमको बादल बनाई नकारात्मक भावना फैलाएको बताएका थिए ।
‘जेठ १९, २०५८ मा घटेको विनाशकारी घटना जुन हामी र हाम्रो परिवारलाई कहालीलाग्दो र सम्झन मन नपराउने अवस्थालाई राजनीतिक जालझेल गरी धेरै नेपालीको मनमा भ्रमको बादल बनाई नकारात्मक भावना फैलाएको थियो । हामी र हाम्रो परिवारलाई घातक प्रहारहरु पनि गरेका थिए । सत्य सधैं सत्य हुन्छ । असत्यको विजयी कहिले हुँदैन । हाम्रो माझ प्रत्यक्षदर्शीहरु हुँदाहुँदै अज्ञानता र छलले अझ पनि हामी बहकिरहेका छौँ । यो अन्यायपूर्ण मात्र होइन दुर्भाग्यपूर्ण पनि हो,’ शाहको भनाइ थियो ।
दरबार हत्याकान्डको छानबिनका लागि तत्कालिन अवस्थामा समिति गठन गरिएको थियो । उक्त समितिले युवराज दीपेन्द्रको दोष देखाएको थियो । सर्वसाधारणमा अझै पनि उक्त घटनाबारे विभिन्न आशंका छन् ।
