भैरहवा । सशस्त्र प्रहरी बल, नेपाल नं. २७ गण हे.क्वा. रुपन्देहीले गत आर्थिक वर्ष ०८१/०८२ मा १३ करोड १० लाख रुपैयाँभन्दा बढी मूल्यको राजस्व छलीका विभिन्न सामग्री बरामद गरेको छ । भारतबाट अवैध रुपमा नेपाल भित्र्याइएका ती सामग्रीहरू नियन्त्रणमा लिएर सम्बन्धित निकायमा बुझाइएको गणले जनाएको छ ।
गणका प्रमुख, सशस्त्र प्रहरी उपरीक्षक (एसपी) मेखराज जोशीका अनुसार, बरामद गरिएका सामग्रीमा कपडा, मोबाइल, मदिरा, चिनी, कुखुरा, रासायनिक विषादी, मोटर पार्टस्, पशु चौपाया र औषधी रहेका छन् । यी सबै सामग्री आवश्यक कारवाहीका लागि भन्सार, राजस्व अनुसन्धान कार्यालय तथा पशु र प्लान्ट क्वारेन्टाइन कार्यालयमा पठाइएको छ ।
तस्करीमा प्रयोग भएका २०८ वटा सवारी साधन पनि नियन्त्रणमा लिइएको छ । जसमा आठ वटा ट्रक, मिनि ट्रक, ट्याक्टर, कार र भ्यान, १० वटा छोटा हात्ती, पाँच वटा अटो रिक्सा, १७५ वटा मोटरसाइकल र १० वटा साइकल छन् । सीमा सुरक्षालाई थप सुदृढ बनाउन मर्चवारी गाउँपालिका-७ मन्झरियामा बोर्डर आउट पोष्ट (बिओपी) स्थापना गरिएको छ । योसँगै जिल्लामा बिओपीको संख्या ७ पुगेको छ ।
यसैगरी, लागुऔषध तथा विष्फोटक पदार्थको ओसारपसार नियन्त्रणका लागि बेलहियामा डग स्क्वाडसहितको चेकजाँचलाई प्रभावकारी बनाइएको गणका डीएसपी एवं सूचना अधिकारी मोहन न्यौपानेले जानकारी दिए ।
गत आर्थिक वर्षमा खैरो हिरोइन र गाँजा जस्ता लागुऔषधसहित चार जनालाई पक्राउ गरी नेपाल प्रहरीलाई बुझाइएको छ । यसका साथै, सशस्त्र प्रहरीले समुदायसँगको सहकार्यमा विभिन्न विपद् सम्बन्धी १२८ वटा सचेतनामूलक कार्यक्रम र अन्य सुरक्षा निकायसँग मिलेर ६ वटा विपद् उद्धार अभ्यास पनि सम्पन्न गरेको छ ।
