रुपन्देही । रुपन्देही निर्वाचन क्षेत्र नम्बर ५ को ताजा मत परिणाम सार्वजनिक भएको छ। हालसम्म कुल ३० हजार २ सय ७४ मत गणना हुँदा घण्टी चुनाव चिह्नका उम्मेदवार तौफिक अहमद खानले अन्य प्रतिस्पर्धीहरूलाई निकै पछाडि पार्दै फराकिलो अग्रता कायम गरेका छन् । प्राप्त पछिल्लो अपडेट अनुसार अग्रस्थानमा रहेका तौफिक अहमद खानले १४ हजार ६ सय ५३ मत प्राप्त गरेका छन् । उनलाई सूर्य चुनाव चिह्नका उम्मेदवार खिमलाल भट्टराईले पछ्याइरहेका छन् । यद्यपि, भट्टराईले हालसम्म ४ हजार ९ सय २८ मत मात्र प्राप्त गरेका छन्, जुन अग्रस्थानमा रहेका खानको भन्दा निकै कम हो ।
त्यसैगरी, रुख चुनाव चिह्न लिएर चुनावी मैदानमा रहेका भरत कुमार शाह ४ हजार ६ सय ८ मतसहित तेस्रो स्थानमा रहेका छन्। दोस्रो स्थानमा रहेका खिमलाल र तेस्रो स्थानका भरतबीचको मतान्तर भने निकै झिनो देखिएको छ। उता, तारा चुनाव चिह्नका उम्मेदवार मोहम्मद वकील मुसलमानले हालसम्म २ हजार ३ सय १४ मत प्राप्त गरेका छन् । प्रमुख दलका उम्मेदवारहरूलाई भारी मतान्तरले पछि पार्दै घण्टीका उम्मेदवारले लिएको यो अग्रतालाई निकै चासोका साथ हेरिएको छ। यस क्षेत्रमा बाँकी मतको गणना कार्य अहिले निरन्तर चलिरहेको छ।
