विराटनगर । इलामको माई नगरपालिकाले आफ्नो क्षेत्रका बारेमा जानकारीमूलक पाठ्यसामग्री ‘हाम्रो माई नगर’ सार्वजनिक गरेको छ ।कक्षा ४, ५ र ८ का लागि स्थानीय पाठ्यक्रमका रुपमा उक्त सामग्री तयार गरिएको हो । नगरपालिकाको शिक्षा, युवा तथा खेलकुद शाखाको आयोजनामा उक्त सामग्री सार्वजनिक गरिएको हो ।
कार्यक्रममा माई नगरपालिका मेयर, उपमेयर, प्रमुख प्रशासकीय अधिकृत, वडाध्यक्ष, कार्यपालिका सदस्य, निजी तथा सामुदायिक विद्यालयका प्रधानाध्यापक र शिक्षकलगायत सरोकारवालाको सहभागिता थियो । त्यस क्रममा माई नगरपालिकका मेयर खम्बासिंह लिम्बूले शिक्षा, स्वास्थ्यलगायत क्षेत्रको लगानीलाई नगरले कम हुन नदिने बताए ।
उपमेयर हिमा भण्डारीले माई नगरभित्रका विभिन्न धर्म, संस्कृति, भाषा र स्वास्थ्यलाई समेत जोडेर पुस्तक प्रकाशन भएकामा खुसी व्यक्त गरिन् । कार्यक्रममा पाठ्यकपुस्तक लेखन तथा सम्पादन समितिमा रही योगदान गर्ने कर्मचारी र शिक्षकलाई सम्मान गरिएको थियो ।
त्यस अवसरमा नगरको शिक्षा शाखा प्रमुख सीतादेवी लावती, प्राविधिक सहायक केशव खनाल, कन्काई माविका प्रधानध्यापक हरिप्रसाद पौड्याल, सहायक प्रअ खेमराज लिम्बू, शिक्षक किरणप्रसाद सुवेदीलाई सम्मान गरिएको थियो ।
यसैगरी, लक्ष्मी आदर्श माविका शिक्षक रुद्र मगर, न्युलाइट बोडिङ्ग स्कुलका प्रिन्सिपल रवीन्द्रराज लोहनी, दीपज्योति आधारभूत विद्यालयका प्रधानाध्यापक तीर्थराज भारती, गरुवा बहुमुखी क्याम्पसका उपप्राध्यापक विजय तामाङ्ग र भगवती माविका सहायक प्रअ सुन्दरमणि बिसीलाई पनि सम्मान गरिएको थियो ।
