भैरहवा । प्रहरी प्रधान कार्यालयले हालैका युवा आन्दोलन तथा प्रदर्शनका क्रममा कर्तव्य पालना गर्दा सहादत प्राप्त गरेका प्रहरीका परिवारलाई प्रति परिवार १० लाख रुपैयाँ राहत प्रदान गर्ने महत्त्वपूर्ण निर्णय गरेको छ ।
मंगलबार बसेको प्रधान कार्यालयको बैठकले यो निर्णय गरेको हो । यस राहतका लागि आवश्यक रकम प्रहरी महानिरीक्षक (आईजीपी) देखि प्रहरी निरीक्षकसम्मका सम्पूर्ण दर्जाका प्रहरी कर्मचारीहरूको मासिक तलबबाट संकलन गरिनेछ ।
पछिल्लो समय जेन-जीको अगुवाइमा भएका आन्दोलन र त्यसपछिका प्रदर्शनहरूमा प्रहरी सहायक निरीक्षक (असई) सहित तीन जना प्रहरी कर्मचारीले आफ्नो कर्तव्य निर्वाहका क्रममा सहादत प्राप्त गरेका थिए । प्रहरी प्रधान कार्यालयले आफ्ना अमर सहिदहरूको उच्च सम्मान गर्दै उनीहरूका शोकाकुल परिवारलाई आर्थिक टेवा पुर्याउने उद्देश्यले यो विशेष राहत प्याकेजको घोषणा गरेको हो । यो निर्णयले कर्तव्यपालनाका क्रममा जीवन उत्सर्ग गर्ने प्रहरी कर्मचारीहरूको योगदानको कदर गर्नुका साथै उनीहरूका परिवारप्रति राज्यको दायित्व र संवेदनशीलतालाई समेत झल्काएको छ ।
