विराटनगर । सशस्त्र प्रहरी बल, नेपालले मानव कंकालसहित एक जनालाई पक्राउ गरेको छ ।विराटनगरको सशस्त्र प्रहरी बल प्रस्तावित सीमा सुरक्षा गुल्म रानीबाट खटिएको टोलीले भारतबाट मानव कंकाल लिएर आउँदै गरेको अवस्थामा विराटनगर महानगरपालिका–१७ का ३७ वर्षीय विनोद रायलाई पक्राउ गरेको हो ।
गुल्मका प्रमुख डीएसपी ऋषिकेश राउतका अनुसार पक्राउ परेका राय रिक्सामा आउँदै गर्दा चेकजाँचको क्रममा उनले बोकेको झोलाबाट ३८ वटा मानव खप्पर र १० वटा नली खुट्टा बरामद भएको हो । साथै, रायसँगै रिक्सामा बसेको एक जना महिला फरार भएको र उनको खोजी भइरहेको उनले जानकारी दिए ।पक्राउ परेका रायलाई आवश्यक अनुसन्धान र कारवाहीका लागि इलाका प्रहरी कार्यालय रानीमा बुझाएको छ । सशस्त्र प्रहरीका अनुसार राय यसअघि पनि मानव कंकालसहित विराटनगरबाट पक्राउ परेका थिए।
