रामेछाप । जिल्लाको सदरमुकाम मन्थली नगरपालिका जिल्लाकै पहिलो ‘बालमैत्री स्थानीय शासन युक्त नगरपालिका’ घोषणा भएको छ। करिब चार वर्षअघि सुरु गरिएको अभियानमार्फत ५१ वटा सूचक पूरा गर्दै नगरपालिकाले बालबालिकाको अधिकार, शिक्षा, स्वास्थ्य, सुरक्षा र सहभागितामा महत्त्वपूर्ण प्रगति हासिल गरी बुधबारबाट बालमैत्री शासन भएको नगर बनेको हो । ¥यालीले ‘बालमैत्री नगर घोषणा’ लेखिएको ब्यानरसहित नगरको मुख्य सडक परिक्रमा गरेपछि तीनलाल पार्कमा आयोजित औपचारिक कार्यक्रममा सो घोषणा गरिएको हो ।
कार्यक्रमका प्रमुख अतिथि वाग्मती प्रदेशका सामाजिक विकास मन्त्री कञ्चनचन्द्र बादेले मन्थलीलाई ‘बालमैत्री स्थानीय शासन युक्त नगरपालिका’ भएको औपचारिक घोषणा गरे । ‘मन्थली नगरपालिकाले निकै महत्त्वका साथ ५१ वटा सूचक पूरा गरेको छ, तपाईँहरूले गरेको मेहनत देखेर मलाई खुसी लागेको छ, अब तपाईँहरू कामलाई अझ अगाडि बढाउनुस्, मेरो नेतृत्वमा रहेको मन्त्रालयले सकेको सहयोग गर्न प्रतिबद्धता व्यक्त गर्दछु ।’
मन्त्री बादेले मन्थलीलाई वाग्मती प्रदेशको ११ औँ बालमैत्री स्थानीय तह घोषणा भएकोमा बधाई दिँदै यस उपलब्धिलाई अन्य पालिकाहरूका लागि पनि प्रेरणादायी उदाहरणको रूपमा प्रस्तुत गरे।
घोषणा कार्यक्रममा मन्थली नगरपालिकाका प्रमुख लव श्रेष्ठले ‘बालमैत्री स्थानीय शासन युक्त नगरपालिका’ बनाउनको लागि गरिएका काम बारे जानकारी दिएका थिए । नगरका १४ वटा वडाले तोकिएको सूचक पुरा गरेपछि ‘बालमैत्री शासन युक्त वडा’ घोषणा गरिएको जानकारी दिए । ‘बालमैत्री स्थानीय शासन युक्त नगरपालिका’ बनाउन सबैको योगदान रहेको उनले बताए । यसलाई निरन्तरता दिन पनि सबैको त्यतिकै भूमिका रहने उनले प्रष्ट पारे । ‘हामीले बालबालिकाका अधिकारलाई प्राथमिकतामा राखेर काम गरेका छौँ, यो घोषणा हाम्रो मात्र सफलता होइन, नगरका सबै क्षेत्र र नागरिकको सहभागिताले सम्भव भएको उपलब्धि हो’, उनले भने ।
कार्यक्रममा गत वर्ष नगरभित्र शैक्षिक सुधार र तथ्याङ्कीय नतिजामा उल्लेखनीय प्रगति गर्ने विद्यालयका प्रअ, शिक्षक तथा विद्यार्थीलाई नगदसहित सम्मान गरिएको थियो । साथै १४ वटै वडाका वडा अध्यक्षहरूलाई कदर पत्र प्रदान गर्दै योगदानको प्रशंसा गरिएको थियो।
२०७९ सालदेखि बालमैत्री नगर घोषणा गर्ने अभियान सुरु गरेको मन्थली नगरपालिकाले करिब चार वर्षमा यो उपलब्धि हासिल गरेको हो। नगरपालिकाले शिक्षा, स्वास्थ्य, बालअधिकार संरक्षण, बालबालिकाको सहभागिता, खेलकुद तथा सिर्जनात्मक गतिविधि, लैङ्गिक समानता र सामाजिक उत्तरदायित्वलगायतका क्षेत्रमा उल्लेखनीय प्रगति गर्दै ५१ वटा सूचक पूरा गरेको छ ।
