बाजुरा । बाजुराको त्रिवेणी नगरपालिकाको प्रमुख प्रशासकीय अधिकृतको रुपमा टेक बहादुर मौनी आएका छन्। संघीय मामिला तथा सामान्य प्रशासन मन्त्रालयले कार्तिक २३ गते उनलाई प्रमुख प्रशासकीय अधिकृतमा पठाएको थियो। मन्त्रालयले प्रशासकीय अधिकृतको रुपमा पठाएसँगै मौनी मंगलबार पालिकामा हाजिर भएका हुन् ।
मन्त्रालयले पालिकामा यसअघि सरुवा भएका उपसचिवहरुको थमौती भएपछि शाखा अधिकृत मौनीलाई प्रमुख प्रशासकीय अधिकृतमा खटाइएको थियो । मौनीलाई पालिकामा भव्य स्वागत गर्दै नगर प्रमुख कर्ण बहादुर थापा, उपप्रमुख कमला जोशी न्यौपाने लगायत अन्य पालिकाका कर्मचारीहरुले उनलाई खादा र फुलमाला सहित भव्य स्वागत गरेका छन् ।
पद सम्हाल्दै प्रमुख प्रशासकीय अधिकृत मौनीले आफू सक्षम तरिकाले पालिकाको जिम्मेवारी वहन गर्ने बताउँदै पालिकाका नागरिकको क्षेत्रमा काम गर्ने बताएका छन् । पालिकाको विकास समृद्धि कुनै कदम पछि नहट्ने र यहाँको प्रशासनिक कामलाई थप चुस्तदुरुस्त बनाउने उनले बताए ।
