भैरहवा । रूपन्देहीको सिद्धार्थनगर नगरपालिका–१ स्थित बाईपास चोकबाट प्रहरीले अवैध आईफोनसहित दुई जना भारतीय नागरिकलाई नियन्त्रणमा लिएको छ । इलाका प्रहरी कार्यालय बेलहियाबाट खटिएको प्रहरी टोलीले भारत उत्तर प्रदेशको महाराजगञ्ज निपनीया बस्ने २६ वर्षका करण चौरसिया र सोही स्थानका १६ वर्षका आकाश चौरसियालाई नियन्त्रणमा लिएको हो ।
निजहरूले युपी ५६ बिएज ७२२९ नम्बरको पल्सर एनएस मोटरसाइकलमा ल्याउँदै गरेको ९ थान आईफोन–१३ नियन्त्रणमा लिइएको प्रहरीले जनाएको छ । बरामद गरिएका आईफोनको अनुमानित मूल्य ४ लाख ५० हजार रूपैयाँ र मोटरसाइकलको मूल्य २ लाख रूपैयाँ गरी जम्मा ६ लाख ५० हजार रूपैयाँ बराबरको सामान रहेको जिल्ला प्रहरी कार्यालय रूपन्देहीका सूचना अधिकारी प्रहरी नायव उपरीक्षक कृष्ण कुमार चन्दले जानकारी दिएका छन् । नियन्त्रणमा लिइएका दुवै जना र बरामद गरिएका सामग्रीबारे प्रहरीले आवश्यक थप अनुसन्धान कार्य जारी राखेको छ ।
