चापाकोट, स्याङ्जा । केही महिनाअघि म्याग्दीमा भएको सवारी दुर्घटनामा परी ज्यान गुमाएका चापाकोट नगरपालिका वडा नम्बर ८ दामाचौर निवासी स्वर्गीय खेमराज कुमालको परिवारलाई नेपाल हेभी इक्विपमेन्ट अपरेटर संघ कास्की, नेपाल हेभी इक्विपमेन्ट अपरेटर संघ गण्डकी प्रदेश र म्याग्दीको संयुक्त पहलमा चार लाख रुपैयाँ आर्थिक सहयोग प्रदान गरिएको छ ।
उक्त सहयोग रकम हस्तान्तरण कार्यक्रम चापाकोट नगरपालिकाका नगरप्रमुख देव बहादुर खाँणको प्रमुख आतिथ्यतामा सम्पन्न भएको हो। कार्यक्रममा बोल्दै नगरप्रमुख खाँणले स्वर्गीय कुमालप्रति श्रद्धाञ्जली व्यक्त गर्दै शोकमा रहेका परिवारलाई धैर्य धारण गर्ने शक्ति मिलोस् भनी कामना गर्नुभयो। उहाँले विभिन्न संघसंस्थाको समन्वयमा गरिएको यो सहयोग उदाहरणीय कार्य भएको बताउँदै आगामी दिनमा पनि यस्ता सामाजिक कार्यहरूलाई निरन्तरता दिनुपर्नेमा जोड दिनुभयो ।
नेपाल हेभी इक्विपमेन्ट अपरेटर संघका प्रतिनिधिहरूले स्वर्गीय कुमाल संघका सक्रिय सदस्य रहेको र उहाँको असामयिक निधनले संघलाई ठूलो क्षति पुगेको बताए । उनीहरूले दुःखको यस घडीमा परिवारलाई सानो भए पनि मल्हम लगाउने उद्देश्यले यो सहयोग संकलन गरिएको जानकारी दिए ।
सहयोग रकम प्राप्त गरेपछि स्वर्गीय कुमालका परिवारले दाताहरूप्रति हार्दिक आभार व्यक्त गरे। उनीहरूले दुःखको यस घडीमा प्राप्त भएको यो सहयोगले ठूलो राहत मिलेको बताएका छन् । कार्यक्रममा नगरपालिकाका विभिन्न वडाका जनप्रतिनिधिहरू, स्थानीय बुद्धिजीवीहरू, संघका पदाधिकारी तथा सदस्यहरू र स्थानीय बासिन्दाहरूको उपस्थिति रहेको थियो।
