सुस्ता । पश्चिम नवलपरासीको सुस्ता गाउँपालिका-२ स्थित भारतीय गण्डक नहर नजिकै झाडीमा एक २५/२६ वर्षीया महिलाको बेवारिसे शव फेला परेको छ । घटनाको जानकारी पाउने बित्तिकै स्थानीय प्रहरी टोली घटनास्थल पुगी अनुसन्धान सुरु गरेको छ ।
जिल्ला प्रहरी कार्यालयका अनुसार, मृत फेला परेकी महिलाको पहिचान हुन सकेको छैन । शव कसको हो र मृत्युको कारण के हो भन्ने बारेमा गहन अनुसन्धान भइरहेको प्रहरीले जनाएको छ । प्रहरी चौकी कुडियाबाट प्रहरी सहायक निरीक्षक ईन्द्रजित यादव र इलाका प्रहरी कार्यालय बेलाटारीबाट प्रहरी निरीक्षक शिव कुमार क्षेत्रीको कमाण्डमा SOCO (Scene of Crime Officer) सहितको टोली खटाईएको छ । टोलीले घटनास्थलको सुक्ष्म अनुसन्धान गरिरहेको छ ।
जिल्ला प्रहरी कार्यालय नवलपरासी (ब.सु.प.) ले मृतक महिलाको पहिचानका लागि सार्वजनिक अपिल गरेको छ । यदि कसैले मृतक महिलालाई चिन्ने वा चिनाउने कुनै जानकारी भएमा नजिकको आफन्तलाई खबर गरिदिनका साथै जिल्ला प्रहरी कार्यालय नवलपरासी (ब.सु.प.) को हटलाईन १००, ०७८-५२०१९९, वा फोन नं. ९८५७०९१२०० मा सम्पर्क गर्न अनुरोध गरेको छ । घटनास्थलमा प्रहरीको अनुसन्धान जारी छ। प्रहरीले छिट्टै नै घटनाको सत्यतथ्य बाहिर ल्याउने बताएको छ ।
