भैरहवा । लामो समयदेखि अन्तर्राष्ट्रिय उडान हुन नसकेका गौतमबुद्ध अन्तर्राष्ट्रिय विमानस्थल, भैरहवा र पोखरा अन्तर्राष्ट्रिय विमानस्थलमा अब विदेशी वायुसेवा कम्पनीहरूले पुनः उडान सञ्चालनको तयारी गरिरहेका छन् । भैरहवामा जजिरा एयरवेज र थाई एयर एसियाले पुनः उडान सुरु गर्ने भएका छन् । थाई एयर एसियाले अक्टोबर २६ देखि हप्तामा दुई उडान गर्ने तयारी गरेको छ भने जजिरा एयरले पनि हिउँदे सिजनमा उडान सुरु गर्ने योजना बनाएको छ । हाल भैरहवाबाट कुनै पनि अन्तर्राष्ट्रिय उडान नियमित सञ्चालनमा छैनन् ।
पोखरा अन्तर्राष्ट्रिय विमानस्थलबाट चीनको सिचुवान एयरलाइन्सले अन्तर्राष्ट्रिय उडानको तयारी गरिरहेको छ। सिचुवान एयरलाइन्सले छेन्दु हुँदै पोखराबाट अष्ट्रेलिया उडान गर्ने तयारी गरेको नेपाल नागरिक उड्डयन प्राधिकरणले जनाएको छ ।
सरकारले यी दुई विमानस्थलमा अन्तर्राष्ट्रिय उडान गर्ने विदेशी वायुसेवालाई आकर्षित गर्न विभिन्न छुट सुविधाहरू प्रदान गरेको छ । अन्तर्राष्ट्रिय उडानका लागि हवाई टिकटमा लाग्ने प्रतियात्रु ३ हजार रुपैयाँको यात्रु सेवा शुल्कमा छुट दिइएको छ । साथै, दुवै विमानस्थलमा पार्किङ, ल्यान्डिङ र न्याभिगेसन शुल्कमा पूर्ण छुटका साथै नेपाल एयरलाइन्सले प्रदान गर्ने ग्राउन्ड ह्यान्डलिङ शुल्कमा ७५ प्रतिशत छुटको व्यवस्था गरिएको छ । प्राधिकरणका अनुसार जजिरा र सिचुवान एयरलाइन्सले उडान सुरु गरेपछि अन्य विदेशी वायुसेवाहरू पनि यी विमानस्थलतर्फ आकर्षित हुने अपेक्षा गरिएको छ ।
