काठमाडौँ । नेपाल प्रहरीको केन्द्रीय अनुसन्धान ब्युरो (सीआईबी) ले करिब रु एक अर्ब ९० करोड अवैध हुन्डी कारोबारमा संलग्न रहेको अभियोगमा एक जनालाई पक्राउ गरेको छ । पक्राउ पर्नेमा धादिङ सत्यदेवी–८ घर भई हाल काठमाडौँको नागार्जुन नगरपालिका–८ बस्ने ४९ वर्षीय राजेन्द्रप्रसाद रिजाल रहेका छन् ।
ब्युरोका प्रवक्ता एवं वरिष्ठ प्रहरी उपरीक्षक अनुपम शमशेर जबराका अनुसार शङ्कास्पद बैंकिङ कारोबार विश्लेषणका क्रममा रिजालले अन्य व्यक्तिहरूसँगको मिलेमतोमा आफ्नो व्यक्तिगत बैंक खाता प्रयोग गरी रु एक अर्ब ८९ करोड ६५ लाख ३९ हजार ४५४ बराबरको हुन्डी कारोबार गरेको पाइएको हो । काठमाडौँ जिल्ला अदालतबाट पक्राउ अनुमति लिई काठमाडौँ महानगरपालिका–८ स्थित गौरीघाट मन्दिर क्षेत्रबाट नियन्त्रणमा लिइएका रिजालमाथि थप अनुसन्धान भइरहेको ब्युरोले जनाएको छ ।
