पाल्पा । फागुन २१ गते हुने प्रतिनिधि सभा सदस्य निर्वाचनको सुरक्षा व्यवस्थापनका लागि अपुग जनशक्ति पूर्ति गर्न जिल्ला प्रहरी कार्यालय पाल्पाले 'निर्वाचन प्रहरी' भर्नाका लागि दरखास्त आह्वान गरेको छ । गृह मन्त्रालयको निर्देशन अनुसार जिल्ला प्रहरी कार्यालयले एक सूचना जारी गर्दै योग्यता पुगेका नेपाली नागरिकहरूबाट आवेदन माग गरेको हो ।
प्रहरी नायव उपरीक्षक होम प्रकाश चौधरीका अनुसार इच्छुक उम्मेदवारहरूले यही माघ १० र ११ गते बिहान १० बजेदेखि साँझ ४ बजेसम्म जिल्ला प्रहरी कार्यालय पाल्पा, सशस्त्र प्रहरी बल नेपाल गुल्म नं. ३५ र इलाका प्रहरी कार्यालय रामपुरमा उपस्थित भई दरखास्त दिन सक्नेछन् । आवेदनका लागि १८ वर्ष पूरा भई ५४ वर्ष ननाघेका, साधारण लेखपढ गर्न जान्ने, शारीरिक तथा मानसिक रूपले स्वस्थ र कुनै पनि राजनीतिक दलको सदस्य नरहेका व्यक्तिहरू योग्य मानिनेछन् ।
छनोट प्रक्रियामा नेपाली सेना, नेपाल प्रहरी, सशस्त्र प्रहरी र वन रक्षकबाट सेवा निवृत्त भएका व्यक्तिहरू, विगतमा म्यादी प्रहरीका रूपमा काम गरेका र विदेशी सुरक्षा निकायमा काम गरी निवृत्त भएका नेपाली नागरिकहरूलाई विशेष प्राथमिकता दिइने जनाइएको छ । आवेदकले पासपोर्ट साइजको ५ प्रति फोटो, नागरिकता, शैक्षिक योग्यता र अनुभवका प्रमाणपत्रहरू साथमा लिएर जानुपर्नेछ ।
यसैगरी, कार्यालयले यसअघि पुस २५ देखि माघ ३ गतेसम्म दरखास्त फारम दर्ता गराएर पनि विविध कारणले शारीरिक तन्दुरुस्ती तथा लिखित परीक्षामा सहभागी हुन नसकेका उम्मेदवारहरूका लागि पनि पुनः अवसर प्रदान गरेको छ । त्यस्ता उम्मेदवारहरूले जिल्ला प्रहरी कार्यालय पाल्पामा सम्पर्क गरी आफ्नो प्रवेश पत्र र नागरिकता लिई माघ १२ गते बिहान ८ बजे हुने परीक्षामा सहभागी हुन सक्ने व्यहोरा समेत प्रहरीले जानकारी गराएको छ । थप जानकारीका लागि जिल्ला प्रहरी कार्यालयको सम्पर्क नम्बर वा नजिकको प्रहरी कार्यालयमा बुझ्न सकिनेछ ।
