भैरहवा । राममणि क्याम्पस र युनिक होम रुपन्देहीको भैरहवामा जारी साई ग्लोबल कप जिल्लास्तरीय अन्तरकलेज टि–२० क्रिकेट प्रतियोगितामा विजयी भएका छन् । आइतबार भएका दुई खेलमा राममणिले लुम्बिनी इन्जिनियरिङ कलेजलाई २५ रन र युनिक होमले न्यु होराइजन (ए) लाई ६ विकेटले पराजित गर्दै विजयी भएका हुन् ।
यहाँस्थित सिद्धार्थ क्रिकेट मैदानमा भएको पहिलो खेलमा टस हारेर ब्याटिङको निम्तो पाएको राममणिले मौसमका कारण १९ ओभरमा छोट्याइएको खेलमा सबै विकेट गुमाउँदै ९९ रन बनायो । उसका लागि थमन सिंजालीले २४, शिवकुमार मौर्यले १९ र रुपेश कुर्मीले १३ रन बनाए । बलिङमा लुम्बिनी इन्जिनियरिङका विनोद गौतमले ४, आशिष भुसालले ३ तथा निरज विष्ट र विपिन न्यौपानेले १–१ विकेट लिए ।
लुम्बिनी इन्जिनियरिङले ८ विकेटको नोक्सानीमा जम्मा ७४ रन बनाउँदै हार व्यहोर्यो । उसका लागि विशाल न्यौपाने र प्रशान्त न्यौपानेले समान १६ तथा सचिन देवाकोटाले ११ रन बनाए पनि अन्य ब्याटर चल्न सकेनन् । बलिङमा राममणिका विकल अधिकारीले ३, रुपेश कुर्मी, आरिक केसी र तुल्सीराम भण्डारीले समान १–१ विकेट लिए । खेलमा विकल अधिकारी प्लेयर अफ द म्याच भई एक हजार रुपैयाँ प्राप्त गरे ।
अर्को खेलमा टस हारेर ब्याटिङ गरेको न्यु होराइजन (ए)ले निर्धारित २० ओभरमा ८ विकेटको नोक्सानीमा १ सय १० रन बनायो । उसका लागि अमर मिश्राले ५९ रनको अर्धशतकीय पारी खेले पनि अन्य ब्याटरले दोहोरो अंकमा रन बटुल्न सकेनन् । बलिङमा युनिक होमका निश्चल चौधरीले ३, अरुण सिंहले २ तथा सविर आलम, इकलाख अहम्मद वारिस र फैजन खानले समान १–१ विकेट लिए ।
जवाफी ब्याटिङ गरेको युनिक होमले १९ ओभरमा ४ विकेट गुमाउँदै १ सय १४ रन बनाउँदै जित निकाल्यो । उसको जितमा निश्चल चौधरीले ४७, सन्तोष यादवले २१ र इकलाख अहम्मद वारिसले अविजित १८ रन बनाए । बलिङमा न्यु होराइजन (ए)का महेश भरले २ तथा राहुल नाउले १ विकेट लिए । खेलमा निश्चल चौधरीले प्लेयर अफ द म्याच भई एक हजार रुपैयाँ पाए ।
रुपन्देही क्रिकेट संघको आयोजना र साई ग्लोबल कलेजको मुख्य प्रायोजनामा प्रतियोगिता भइरहेको हो । प्रतियोगिताको विजेता टिमले ५५ हजार, उपविजेताले २५ हजार ५ सय ५५ रुपैयाँसहित ट्रफी, मेडल र प्रमाणपत्र प्राप्त गर्नेछन् । यस्तै, प्रत्येक खेलको प्लेयर अफ द म्याचलाई १ हजारसहित प्रमाणपत्र, प्लेयर अफ द सिरिजलाई १० हजारसहित ट्रफी र प्रमाणपत्र प्रदान गरिनेछ । यस्तै, बेस्ट बलर र बेस्ट बलरलाई जनही ५ हजारसहित ट्रफी र प्रमाणपत्र तथा अनुशासित टीमलाई ट्रफी र प्रमाणपत्र प्रदान गरिने खेल संयोजक उदयकुमार मल्लिकले जानकारी दिए ।
