नवलपरासी । नवलपरासीको प्रतापपुर गाउँपालिकामा करिब १३ करोड रुपैयाँको लागतमा छुट्टाछुट्टै प्रशासनिक र प्रसूति (बर्थिङ) भवन निर्माण सम्पन्न भएको छ । गाउँपालिकाले धार्मिक कार्यक्रमसहित गृह प्रवेश गरेसँगै शुक्रबारदेखि दुवै नयाँ भवनबाट औपचारिक रूपमा सेवा प्रवाह सुरु गरेको छ ।
गाउँपालिकाका इन्जिनियर आनन्द यादवका अनुसार, संघीय सरकारको ५ करोड ४० लाख र गाउँपालिकाको ६ करोड ९ लाख गरी कुल ११ करोड ४९ लाख रुपैयाँको लागतमा चार तले प्रशासनिक भवन निर्माण गरिएको हो । यस भवनमा कार्यपालिका बैठक कक्ष र सभा कक्षसहित ३४ वटा कोठाहरू रहेका छन् ।
विगतमा दुईवटा घर भाडामा लिएर सञ्चालन हुँदै आएको गाउँपालिकालाई अब आफ्नै भवन भएपछि आर्थिक भार घट्ने र सेवा विस्तारमा सहज हुने अध्यक्ष उमेशचन्द्र यादवले बताउनुभयो । दुई वर्षअघि निर्माण सुरु भएको यो भवन गत जेठमा सम्पन्न भएको थियो ।
त्यसैगरी, संघीय सरकार, प्रदेश सरकार र गाउँपालिकाको संयुक्त लगानीमा कुल १ करोड ३३ लाख ६९ हजार रुपैयाँको लागतमा दुई तले प्रसूति भवन पनि निर्माण गरिएको छ । डेढ वर्षअघि निर्माण थालिएको यो भवन गत फागुनमा सम्पन्न भएको हो र यसमा भिडियो एक्स-रे लगायतका सुविधाहरू रहेका छन् । यो नयाँ प्रसूति भवनसँगै गाउँपालिकामा अब चार स्थानबाट प्रसूति सेवा उपलब्ध हुनेछ ।
