भैरहवा । भैरहवास्थित युनिभर्सल कलेज अफ मेडिकल साईन्सेज शिक्षण अस्पताल (युसीएमएस) ले प्रोक्टोलोजी (पाइल्स, फिस्टुला आदि) क्षेत्रमा अत्याधुनिक लेजर प्रविधिबाट शल्यक्रिया सेवा सुरु गरेको छ । देवदह नगरपालिका–१२ का २१ वर्षीय प्रविण हरिजनको यस प्रविधिबाट सफल शल्यक्रिया गरिएको छ र उनी डिस्चार्ज भइसकेका छन्।
अस्पतालका शल्यक्रिया विभागका एसोसिएट प्रोफेसर डा. सन्तोष मिश्र, डा. सन्देश खड्का, डा. समी कुमार शाह, एनेस्थेसिया विभागका प्रमुख प्रा.डा. लक्ष्मी पाठक, डा. विजय यादव लगायतको टोलीले यो शल्यक्रिया गरेको थियो।
डा. मिश्रका अनुसार लेजर शल्यक्रिया परम्परागत शल्यक्रियाभन्दा धेरै फाइदाजनक छ। यसमा रक्तस्राव कम हुने, संक्रमणको जोखिम न्यून हुने, अस्पताल बसाई अवधि छोटो हुने, सफलता दर उच्च रहने र बिरामी चाँडै सामान्य जीवनशैलीमा फर्किन सक्ने जस्ता फाइदाहरू छन् । यो सेवा सुरु भएपश्चात् रुपन्देही र आसपासका जिल्लाका बिरामीहरूले आधुनिक, सुरक्षित र प्रभावकारी शल्यक्रिया उपचार प्राप्त गर्न थप सहज हुने अस्पतालका सूचना अधिकारी सुशील गुरुङ्गले बताउनुभयो।
