भैरहवा । रुपन्देहीको गैडहवा गाउँपालिका वडा नम्बर ६ सूर्यपुराघाटमा मूर्ति विसर्जन गर्ने क्रममा डुबेर तीन जना युवाको ज्यान गएको छ । मृत्यु हुनेमा मायादेवी गाउँपालिका वडा नम्बर–१ का १३ वर्षीय अजय हरिजन, १५ वर्षीय दीपु हरिजन र २८ वर्षीय रोहित हरिजन रहेका छन् ।
जिल्ला प्रहरी कार्यालय रुपन्देहीका प्रहरी प्रवक्ता सुरज कार्कीका अनुसार, बेपत्ता भएको खबर प्राप्त भएपछि प्रहरी र स्थानीयको सहयोगमा खोजी कार्य सुरु गरिएको थियो । खोज्ने क्रममा करिब २०० मिटर तल उनीहरूको शव फेला परेको थियो । दानव र कञ्चन नदीको संगमस्थल सूर्यपुरास्थित सन्तेश्वर घाटमा उनीहरू मूर्ति सेलाउन गएका थिए । सोही घाटमा छठ पर्वको तयारी पनि चलिरहेको थियो ।
