अर्घाखाँची । स्थानीय सरकारको प्रत्याभूति दिलाउने उद्देश्यले अर्घाखाँचीको शीतगंगा नगरपालिकाले ग्रामीण भेगका गर्भवती महिलाहरूका लागि गाउँमै पुगेर भिडियो एक्सरे सेवा सुरु गरेको छ । नगरपालिकाले वार्षिक क्यालेन्डर नै बनाएर विशेषज्ञ चिकित्सक र आवश्यक उपकरणसहित घरदैलोमै निःशुल्क स्वास्थ्य जाँच अभियान थालेको हो ।
नेपालकै सबैभन्दा ठूलो भूगोल भएको यस नगरपालिकाका विकट बस्तीबाट सामान्य चेकजाँचका लागि बजारसम्म आउन नसक्दा गर्भवती र शिशुको अकालमै ज्यान जाने जोखिम रोक्न यो कार्यक्रम ल्याइएको नगर प्रमुख छविलाल पौडेलले बताए । प्रमुख प्रशासकीय अधिकृत कृष्णप्रसाद सापकोटाका अनुसार आ.व. ०८२/०८३ को अभियान अन्तर्गत सीतापुर स्वास्थ्य चौकीबाट १४ जना गर्भवतीको जाँच गरी सेवाको सुरुवात गरिएको छ ।
स्वास्थ्य सेवाका अतिरिक्त नगरपालिकाले एकीकृत घुम्ती शिविरमार्फत योजना सम्झौता लगायतका प्रशासनिक सेवा पनि वडा तहमा नै पुर्याएको छ । सामान्य योजना सम्झौताका लागि ४/५ हजार खर्च गरेर नगरपालिका धाउनुपर्ने बाध्यता हटेको भन्दै उपप्रमुख गीता भाटले यसबाट जनतालाई ठूलो राहत मिलेको बताइन् ।
नगरपालिकाका कार्यक्रम अधिकृत नुमलाल खनालले पहिलो चरणमा वडा नं ८, ९ र १० मा सेवा दिइएको र १४ वटै वडामा पुग्ने लक्ष्य रहेको जानकारी दिए । गाउँमै आफ्नै घरआँगनमा स्वास्थ्य र प्रशासनिक सेवा पाएपछि स्थानीय बासिन्दाले ‘सिंहदरबारको अधिकार गाउँ-गाउँमा’ भन्ने नाराको वास्तविक अनुभूति गर्न पाएको भन्दै खुसी व्यक्त गरेका छन् ।
