दाङ । नेपाल सरकार र गृह मन्त्रालयको निर्णयबमोजिम प्रहरी नायब महानिरीक्षक (डीआइजी) भूपेन्द्र बहादुर खत्रीले लुम्बिनी प्रदेश प्रहरी कार्यालय, दाङको प्रमुखको जिम्मेवारी सम्हालेका छन्। केन्द्रीय अनुसन्धान ब्यूरो (सीआइबी) बाट सरुवा भई आएका खत्रीले बुधबार आयोजित एक समारोहका बीच औपचारिक रूपमा पदभार ग्रहण गरेका हुन् ।
जिम्मेवारी सम्हाल्दै डीआइजी खत्रीले शान्ति सुरक्षा अमनचयन, अपराध नियन्त्रण तथा नागरिकमैत्री प्रहरी सेवा प्रवाहमा आफू पूर्ण प्रतिबद्ध भएर लाग्ने बताए। उनले प्रहरी संगठनलाई थप अनुशासित, व्यावसायिक र जनउत्तरदायी बनाउने प्रतिबद्धता व्यक्त गरेका छन् भने उनको नेतृत्वमा लुम्बिनी प्रदेशको सुरक्षा अवस्था थप सुदृढ हुने अपेक्षा गरिएको छ।
