भैरहवा । भैरहवामा जारी सातौं लुम्बिनी महोत्सव–२०८२ को अवसर पारेर लैगिक हिंसा विरुद्धको सचेतनामूलक सडक नाटक मञ्चन गरिएको छ । ३४ औं अन्तर्राष्ट्रिय लैगिक हिंसाविरुद्धको १६ दिने अभियानको सन्दर्भमा सिद्धार्थनगर नगरपालिकाको आयोजनामा उक्त नाटक मञ्चन गरिएको हो ।
‘प्रविधिको सही प्रयोग गरौः लैगिक हिंसा अन्त्य गरौं’ भन्ने मूल नाराका साथ आयोजित कार्यक्रममा उज्यालो सन्देशको धकधई नाटक समूहले आफ्नो प्रस्तुति दिएको थियो । नाटकमा विशेषगरी तराई क्षेत्रमा विद्यमान दाइजो प्रथा, छोरा नपाएको निहुँमा महिलामाथि हुने कुटपिट तथा हिंसा, छोरा-छोरीबीचको विभेद र बुहारीलाई गरिने भेदभावपूर्ण व्यवहारलाई कलाकारहरूले जीवन्त रूपमा उतारेका थिए । साथै, नाटकमा न्यायिक समितिले न्याय सम्पादनमा खेल्ने उल्लेख्य भूमिकालाई समेत देखाइएको थियो ।
कार्यक्रमका प्रमुख अतिथि एवं सिद्धार्थनगर नगरपालिकाका प्रमुख (मेयर) तथा संविधानसभा सदस्य इस्तियाक अहमद खानले नाटकले समाजको यथार्थ चित्रण गरेको बताउनुभयो । नाटक समूहको प्रशंसा गर्दै मेयर खानले भन्नुभयो, ‘‘तराईमा हुने विभिन्न किसिमका हिंसालाई नाटकमा दुरुस्तै देखाइएको छ । दाइजो माग्ने, छोरा नजन्मेको भन्दै कुटपिट गर्ने जस्ता गलत प्रवृत्ति अन्त्य हुन जरुरी छ ।’’
मेयर खानले बुहारीलाई बुहारी नभई छोरीजस्तै माया गर्नुपर्ने सन्देश नाटकले प्रवाह गरेको बताउँदै महिला र पुरुषले एकअर्कालाई सम्मान गर्नुपर्नेमा जोड दिनुभयो । सोही अवसरमा उहाँले न्यून पारिश्रमिकमा पनि समाजमा महत्त्वपूर्ण योगदान पुर्याउँदै आएका महिला स्वास्थ्य स्वयंसेविकाहरूलाई सम्मान समेत व्यक्त गर्नुभयो । कार्यक्रममा विशेष अतिथि एवं सिद्धार्थनगर नगरपालिकाकी उपमेयर उमा अधिकारीले पनि लैगिक हिंसा अन्त्यका विषयमा आफ्नो धारणा राख्नुभएको थियो ।
उद्योग व्यापार संगठन, रूपन्देहीका सचिन रोक्काको समेत उपस्थिति रहेको उक्त कार्यक्रमको सञ्चालन खेमराज रेग्मीले गर्नुभएको थियो । नाटक अवलोकनका लागि नगरपालिकाका विभिन्न शाखाका कर्मचारी, विद्यार्थी तथा महोत्सवमा आएका दर्शकहरूको उल्लेख्य सहभागिता रहेको थियो ।
