परासी । पश्चिम नवलपरासीको रामग्राम नगरपालिकाका नगर प्रमुख धनपत यादवले व्यक्तिगत खर्चमा झन्डै १५ घरपरिवारलाई खाद्यान्न सहयोग गर्नुभएको छ ।
पाल्हीनन्दन–६ पडरी र सनईका आगलागी पिडितलाई यादवले खाद्यान्न सहितका राहत सामाग्री वितरण गर्नुभएको हो । वडा अध्यक्ष कृष्णचन्द्र यादवको रोहवरमा उहाँले पडरीका १३ र सनईका २ गरी १५ घरपरिवारलाई राहत वितरण गर्नुभएको छ ।
२५ किलो चामल सहित दाल, तेल, नुन, चिनी, आलु, प्याज लगायतका खाद्यान्न सामाग्री सहित साबुन, सर्फ लगायतका दैनिक आवश्यक सामाग्री आगलागी पिडितलाई वितरण गरेको वडा अध्यक्ष यादवले बताउनुभयो । सो क्रममा नगर प्रमुख यादवले जुनसुकै पालिका वा स्थानका भएपनि विपत्तिको समयमा सक्दो सहयोग सबैले गर्नुपर्नेमा जोड दिनुभयो । विपत्तिको समयमा कुनै पालिकाको घेरा भित्र मात्र सिमित नभई सके सम्म सहयोग गर्नुपर्छ भन्ने उदेश्यले आफुले व्यक्तिगत रुपमा राहत वितरण गरेको यादवको भनाई थियो ।
पाल्हीनन्दनको पडहरीमा केहि दिन अगाडी भएको आगलागीमा १३ घरमा आगो लाग्दा ४ ओटा घर पुर्णरुपमा जलेर नष्ट भएको थियो भने बाँकि घरमा आंशिक क्षति भएको छ । सबै परिवार अन्नपात लत्ताकपडा जलेपछि अहिले बिचल्लीमा परेका छन् ।
