काठमाडौं । राष्ट्रिय खेलकुद परिषद् (राखेप)को आयोजनामा पारा तथा विशेष खेलकुद प्रतियोगिता सुरु भएको छ ।
राष्ट्रिय खेलकुद परिषद्को कार्यालय त्रिपुरेश्वरमा सुरु भएको प्रतियोगिताको उद्घाटन राखेपका सदस्य सचिव टंकलाल घिसिङ गरे ।
प्रतियोगितामा विभिन्न १३ खेलको प्रतिस्पर्धा हुने पारा तथा विशेष खेलकुद प्रतियोगिता व्यवस्थापन तथा सञ्चालन समितिकी संयोजक राखेपकी सदस्य पेमा डोल्मा लामाले बताइन् ।
एथलेटिक्स, व्हीलचेयर बास्केटबल, बोसिया, क्रिकेट, साइक्लिङ, एम्पुटी फुटबल, दृष्टिविहीन गोलबल, जुडो, साउन्ड टेबलटेनिस, पारा टेबलटेनिस, पौडी र भारोत्तलनको प्रतिस्पर्धा हुनेछ ।
१२५ स्वर्ण, १२५ रजत र १४३ कांस्यका लागि प्रतिस्पर्धा हुनेछ ।
पारा राष्ट्रिय खेलकुदको उद्घाटन गर्दै राखेपका सदस्य सचिव टंकलाल घिसिङले नेपाली खेलाडीहरुले पेरिस पारा ओलम्पिकमा छनोट भइरहँदा यहाँ पाराको नाममा झगडा गर्नु दुःखद रहेको बताए ।
उनले भने, ‘पारा राष्ट्रिय खेलकुदको विकास, गतिशीलताका लागि नेपाली पारा ओलम्पिकले खेलले उचाइ हासिल गर्दैगर्दा हामी पाराका नाममा झगडा गर्नु दुःखद पक्ष हो । पेरिस पारा ओलम्पिकमा नेपालबाट सहभागिता जनाउन दुई जना खेलाडी सहभागि हुँदै गर्दा त्यसले एउटा उचाइ हाँसिल गरेको छ । तर हामी देशभित्र पाराका नाममा एकअर्कासँग विवाद गर्नु दुःखद पक्ष हो ।’
