काठमाडौं । महिला बालबालिका तथा जेष्ठ नागरिकमन्त्री सुरेन्द्रराज आचार्यले अपाङ्गता परिचयपत्र वितरणमा डिजिटल प्रविधिको प्रयोग गर्न आवश्यक रहेको बताएका छन् ।
शुक्रबार सिंहदरबारमा बसेको राष्ट्रिय सभा अन्तरर्गतको दिगो विकास तथा सुशासन समिति अपाङ्गता भएका व्यक्तिहरुको कार्यान्वयन सम्बन्धी विषयमा भएको छलफलमा उनले अपाङ्गता परिचय पत्र वितरणमा पहुँचवालाले लिने र पहुँच नपुग्दा नपाउने अवस्था रहेको भन्दै न्यायोचित ढङ्गले वितरणका लागि यसलाई डिजिटल प्रविधिमा ल्याउन जरुरी रहेको बताए ।
उनले भने,‘अपाङ्गता परिचय पत्र स्थानीय तहमा त्यो समस्यामा पीडित हामी राजनीतिकर्मी पछि छौं । अलिकति पहुँचवालाले लिईपनि हाल्छ । पहुँच नपुग्दा नपाएको पनि अवस्था छ । त्यसैले त्यसलाई अलिकति न्यायोचित ढङ्गले वितरण गर्नेबारे छलफल गरेर गर्न सक्यौ भने राम्रो हुन्छ । यसलाई डिजिटल प्रविधिमा ल्याउन जरुरी छ । त्यसको प्रक्रियापनि न्यायोचित हुनुपर्छ ।’
उनले अपाङ्गताको अधिकारको कार्यान्वयनका निमित्त राष्ट्रिय संकल्प प्रस्ताव पास भएको भन्दै त्यसको प्रभावकारी कार्यान्वयनका निमित्त अन्तरमन्त्रालयको तत्काल बैठक राखेर प्रभावकारी बनाएर लैजानका लागि मन्त्रालय अघि बढ्ने बताए ।
