भैरहवा । रूपन्देहीको सिद्धार्थनगर नगरपालिका–१ पिपलबोट क्षेत्रबाट सशस्त्र प्रहरीले अवैध रूपमा भारतबाट नेपाल ल्याउँदै गरेको करिब १ लाख २० हजार रुपैयाँ बराबरको सामान बरामद गरेको छ। सशस्त्र प्रहरी बल नेपाल सीमा सुरक्षा गुल्म हे.क्वा. डण्डा, रूपन्देहीबाट सशस्त्र प्रहरी नायव निरीक्षक गणेश बहादुर रोका मगरको नेतृत्वमा खटिएको चेकपोइन्ट टोलीले उक्त अवैध सामान नियन्त्रणमा लिएको हो। बरामद गरिएका सामग्रीहरूमा अन्दाजी ३० हजार रुपैयाँ मूल्यको ५० किलोग्राम प्लास्टिकको फूल, ५० हजार रुपैयाँ मूल्यको ३० किलोग्राम पानको पत्ता र ४० हजार रुपैयाँ मूल्यका २५० पिस सयपत्री फूलको माला रहेका छन्।
कार्यालयका अनुसार बरामद गरिएको प्लास्टिकको फूल आवश्यक कारबाहीका लागि भन्सार कार्यालयमा बुझाइएको छ भने पानको पत्ता र सयपत्री फूलको माला नष्ट गर्ने प्रक्रिया अगाडि बढाइएको छ। यता, भारतीय फूलको अवैध आयातका कारण स्वदेशी फूल किसानहरू मारमा परेको वर्तमान अवस्थामा सशस्त्र प्रहरीले यस प्रकारका माला तथा फूलको अवैध कारोबार रोक्न पुर्याएको योगदानप्रति स्थानीय कृषक तथा व्यापारीहरूले खुसी व्यक्त गरेका छन्। पछिल्लो समय सशस्त्र प्रहरीमा डिएसपी गोपीकृष्ण भट्टराई आएदेखि सीमा क्षेत्रमा सुरक्षा व्यवस्था थप मजबुत हुनुका साथै राजस्व संकलन र अवैध तस्करी नियन्त्रणमा समेत उल्लेख्य सुधार आएको छ।
