शान्ति नमूना माविको बस ट्याक्टरसँग ठोक्किँदा २२ विद्यार्थी घाइते

भैरहवा । रुपन्देहीको ओमसतिया गाउँपालिका–४ बसन्तपुरमा विद्यार्थी सवार बस दुर्घटना हुँदा २२ जना भन्दा बढी घाइते भएका छन् । शान्ति नमूना माध्यमिक विद्यालयका विद्यार्थीहरू लिएर परासीतर्फबाट आउँदै गरेको लु १ ख ८६७५ नम्बरको बस आज बिहान करिब साढे ६ बजेतिर दुर्घटनामा परेको हो । बसन्तपुरस्थित टोल गेट नजिकै ट्याक्टरसँग ठोक्किएर उक्त दुर्घटना भएको प्रहरीले जनाएको छ ।

दुर्घटनामा परी घाइते भएका विद्यार्थीहरूको हाल विभिन्न अस्पतालमा उपचार भइरहेको छ । घाइतेमध्ये ११ जनाको भैरहवास्थित युनिभर्सल कलेज अफ मेडिकल साइन्सेज (भैरहवा मेडिकल कलेज) र बाँकी ११ जनाको भीम अस्पतालमा उपचार भइरहेको छ । घाइतेमध्ये दुई जनाको टाउकोमा चोट लागेको छ भने अन्य सबैको सामान्य रहेको जिल्ला प्रहरी कार्यालय रुपन्देहीका सूचना अधिकारी गणेश सापकोटाले जानकारी दिएका छन् । बिहानको समयमा विद्यार्थी लिएर फर्किने क्रममा बस दुर्घटनामा परेको हो । घटनाको थप विवरण आउन बाँकी रहेको र प्रहरीले अनुसन्धान गरिरहेको जनाएको छ ।