काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले प्रतिनिधिसभाको रोष्ट्रममै उभिएर भौतिक पूर्वाधार मन्त्रालयको बजेट पुस्तिका च्यातेका छन् ।
मंगलबार बसेको प्रतिनिधि सभामा मन्त्रालयगत बजेटमाथिको छलफलमा भाग लिएका लिङ्देनले भौतिक पूर्वाधारमन्त्री रघुबीर महासेठले आफ्नो गृह जिल्ला र निर्वाचन क्षेत्रमा मात्र अर्बौंको बजेट बिनियोजन गरेकोप्रति उनले विरोध गर्दै बजेट पुस्तिका नै च्यातेका हुन् ।
‘सामान्यतया म आफूलाई हेर्दा कम आक्रोश पोख्ने, कम रिसाउन मान्छे हुँ । रिस उठ्छ कहिलेकाहीँ तर एकछिनपछि सेलाउने र मन बुझाउने ठान्छु । तर, जब भौतिक पूर्वाधार मन्त्रालयको बजेटको पुस्तिका हातमा पर्यो त्यो दिनदेखि म यसरी तातिएको छु कि यसरी च्यातेर (बजेट पुस्तिका च्यात्दै) हुर्याउन मन छ । तर, यो संसदीय मर्यादा विपरीत हुन्छ भनेर कहाँ हुर्याउनुपर्ने त्यहाँ नहु¥याएर यहाँ (पोडियम) राख्छु मैले’, उनले भने ।
उनले चारवटा निर्वाचन क्षेत्रमा मनपरी रुपमा बजेट बिनियोजन गरिएकोप्रति रुष्ट हुँदै उनले च्यातेको बजेट पुस्तिक चारवटा बाहेक अन्य प्रतिनिधि सभा सदस्यको मनको कुरा भएको चर्चा गरे ।
उनले सामान्य मर्यादा समेत नराखी राज्यस्रोत माथि गरेको मनपरी सहन नसक्ने बताए । उनले भने, ‘यहाँ जिल्लाको नाम छाप्दा धेरै देखिन्छ भनेर जिल्लाको नामै नराखी योजना राखिएको छ । ’
यस्तै उनले कसैको निर्वाचन क्षेत्रमा एउटै योजना नराख्ने र कसैकोमा अर्बौंको योजना राख्नुपर्ने कारण, विधि र पद्धतिबारे जानकारी दिनुपर्ने माग गरे । महासेठले बजेट बनाउँदा विधि भत्काएको बताएका लिङ्देनले त्यसले देशको विधि भत्काउने राप्रपाको कामलाई सहयोग गरेको तर्क गरे ।
