पश्चिम नवलपरासी ।पश्चिम नवलपरासीको सरावल गाउँपालिका–६, भुजहवाका युवा समाजसेवी वीरेन्द्र यादवले गरिब र विपन्न परिवारका लागि निःशुल्क शववाहन सेवा र पाँच क्विन्टल दाउरा उपलब्ध गराउने अभियान सुरु गरेका छन्। शववाहनको अभावमा मृतकको अन्त्येष्टिमा भइरहेको कठिनाइलाई मध्यनजर गर्दै यादवले आफ्नो निजी पिकअप गाडीलाई शववाहनको रूपमा प्रयोग गरी यो सेवा सुरु गरेका हुन्। साथै, उनले अन्त्येष्टिका लागि आवश्यक पर्ने पाँच क्विन्टल दाउरा पनि निःशुल्क उपलब्ध गराउने घोषणा गरेका छन् ।
स्थानीय बासिन्दाहरूले यादवको यस कार्यको खुलेर प्रशंसा गरेका छन्, किनकि यसअघि शव दुवानीमा ठूलो समस्या थियो र कतिपय अवस्थामा शवलाई साइकल वा ठेलामा बोकेर लैजानु पर्ने बाध्यता थियो। यादवले भने, “गरिब र विपन्न परिवारलाई शव व्यवस्थापनमा आर्थिक संकटका कारण थप पीडा सहन नपरोस् भन्ने मेरो चाहना हो। यो सेवा मेरो सामाजिक दायित्व हो।”
उनको यो सेवा २४ घण्टा उपलब्ध हुनेछ र मृतकको घरमै शववाहन पठाउने व्यवस्था गरिएको छ। यादवले सेवाका लागि ९८५७०४६३३१ र ९८२१४९२८५० सम्पर्क नम्बर पनि सार्वजनिक गरेका छन्। स्थानीय सामाजिक अभियन्ता र जनप्रतिनिधिहरूले उनको यो कार्यले समाजसेवाको नयाँ आयाम थपेको बताएका छन्। यस कार्यले मानवता, सहयोग र सहानुभूतिको संस्कारलाई बलियो बनाउने प्रेरणा दिएको छ।
