काठमाडौँ । अर्घाखाँचीमा बाँदर, बँदेललगायतका जंगली जनावरले किसानलाई दुःख दिएको भन्दै नेपाली कांग्रेसको जिल्लास्तरीय टोलीले गृह मन्त्रालयको ध्यानाकर्षण गराएको छ । नेपाली कांग्रेस, अर्घाखाँचीका सभापति केशव श्रेष्ठको नेतृत्वमा गएको प्रतिनिधिमण्डलले गृहमन्त्री रमेश लेखकलाई भेटेर ज्ञापनपत्र बुझाएको हो ।
टोलीले अर्घाखाँचीलगायत पहाडी जिल्लाहरूमा किसानले लगाएको अन्नबाली जंगली जनावरले नष्ट गरिदिँदा ठूलो सास्ती व्यहोर्नुपरेको भन्दै तत्काल ठोस कदम चाल्न माग गरेको छ । ज्ञापनपत्र बुझाउन सभापति श्रेष्ठसँगै नेपाली कांग्रेस लुम्बिनी प्रदेशका सहमहामन्त्री विष्णु मुस्कान, प्रदेश सदस्य शान्ता भण्डारी, महाधिवेशन प्रतिनिधि डा. मुक्ति श्रेष्ठ, सूर्यप्रसाद अधिकारी, तारा श्रेष्ठ, शीतगंगा नगरपालिकाका मेयर छविलाल पौडेल, उपमेयर गीता भाट तथा अन्य नेतृहरू सहभागी थिए।
जवाफमा गृहमन्त्री लेखकले यो समस्या पहाडी क्षेत्रको एक जटिल समस्याको रूपमा रहेको स्वीकार गर्दै यसको समाधानका लागि मन्त्रालयले गृहकार्य गरिरहेको बताउनुभयो। उहाँले अपनाउन सकिने उपायहरूको प्रभावकारिता र कानुनी पक्षहरूको अध्ययन गरी छिट्टै निष्कर्षमा पुग्ने आश्वासन दिनुभएको सभापति श्रेष्ठले जानकारी दिनुभयो।
